Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 96 Hüküm no: 27 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evhaddin mahallesinden Fatma bt. Ömer’in bakmakta olduğu küçük oğlu Ali içün boşandığı kocasından nafaka alması Nafaka-i sagīr Mahmiye-i İslâmbol’da el-Hâc Evhaddin mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Fatıma bt. Ömer nâm hatun meclis-i şer‘-i şerîf-i enverde zevc-i muhâlı‘ı es-Seyyid Mehmed b. Süleyman nâm kimesne mahzarında takrîr-i kelâm ve bast ani’l-merâm edip zevc-i muhâlı‘ım mezbûr es-Seyyid Mehmed’in firâşından hâsıl ve benden mütevellid ve hâlâ bi-hakkı’l-hıdâne hacr u terbiyemde olan sadrî sagīr oğlum es-Seyyid Ali’nin mâlı olmayıp nafaka ve kisveye ihtiyâcı olmağla sagīr-i mezbûrun nafaka ve kisvesi içün babası mezbûr es-Seyyid Mehmed üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi ber-vech-i muharrer sagīr-i mezbûrun nafaka ve kisvesi içün babası mezbûr es-Seyyid Mehmed üzerine bi’t-terâzî târih-i kitâbdan küllü yevm dörder para farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve-bahâsı içün ve sâir levâzım-ı zarûriyesine harc ü sarfa ve vakt-i zarûretde istidâneye ve inde’z-zafer babası mezbûr es-Seyyid Mehmed üzerine rücû‘a mezbûre Fatıma Hatun’a izin vermeğin mâ-vaka‘a bi’t-taleb ketb olundu. Fî 16 min-Şevvâli’l-mükerrem sene 1196 Şühûdü’l-hâl: Ali b. Abdullah, Yakub b. Ömer, Hasan Ağa b. Mehmed, Mehmed b. Hüseyin, Molla Ali b. Halil, Mustafa b. Mustafa.