Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 219 Hüküm no: 201 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden Rukiye bt. İbrahim’in dükkân arsalarını Ali Efendi’ye satması Arsa mübâya‘ası Mahmiye-i İslâmbol’da Koca Mustafa Paşa Câmi‘-i şerîfi kurbünde Bâzergân mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Rukiye bt. İbrahim nâm hatun meclis-i şer‘-i hatîr-i lâzımü’t-tevkīrde bâ‘isü hâze’l-kitâbi’l-müstetâb es-Seyyid Ali Efendi b. es-Seyyid Mehmed mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Davudpaşa mahallesinde vâki‘ bir tarafdan Çörekçi fırını ve bir tarafdan Kefçe Hamamı ve iki tarafdan tarîk-i âm ile mahdûd birbirine muttasıl biri manav ve biri berber iki bâb muhterik dükkân arsalarımı tarafeynden îcâb ve kabûlü hâvî, şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Ali Efendi’ye iki yüz doksan beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz doksan beş guruşu mezbûr es-Seyyid Ali Efendi yedinden tamamen ahz ü kabz eyledim, ba‘de’l-yevm zikr olunan dükkânlar enkāz-ı mevcûdesiyle mezbûr es-Seyyid Ali Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 9 S sene 1197 Şühûdü’l-hâl: Mustafa Efendi b. Hasan, diğer Mustafa Efendi b. Mehmed İmâm-ı mahalle-i Davudpaşa, Mehmed Salim Efendi b. Hüseyin, Hüseyin Efendi b. İbrahim, Molla Ali b. Halil, Salih b. Halil, Hacı Hasan b. Osman.