Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 232 Hüküm no: 220 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin esamesini Mehmed Haşim’e devretmesi Esâme kasr-ı yedi Mahmiye-i İslâmbol hısnı ebvâbından Yedikule hâricinde vâki‘ selhhânede sâkin Ali Efendi b. Ali nâm kimesne meclis-i şer‘-i şerîf-i enverde işbu bâ‘isü’l-vesîka es-Seyyid Mehmed Haşim b. es-Seyyid İsmail nâm kimesne mahzarında benim Silahdâr Ocağı’nda Onbeşinci Bölük’de Hüseyin nâm kırâet olunur yevmî altı akçe esâmîmi bundan akdem mezbûr es-Seyyid Mehmed Haşim’e kendi hüsn-i rızâ ve ihtiyârımla ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an kırk sekiz guruş def‘ ve teslîm ve ben dahi tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr es-Seyyid Mehmed Haşim’in zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr kırk sekiz guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 18 S sene 1197 Şühûdü’l-hâl: Mehmed Bey b. ( ), Ebûbekir b. İsmail, Ahmed Ağa b. Abdullah, İbrahim b. Mustafa, Salih b. Halil, Veliyüddin Çavuş b. Osman, Molla Ali b. Halil.