Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 254 Hüküm no: 249 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya mahallesinden Filibon v. Dimo’nun bakkal dükkânı ile içinde olan eşyalardaki hissesini Abdullah Efendi’ye satması Bakkāl dükkânı ile gediği mübâya‘adır. Mahmiye-i İslâmbol’da Mevlevîhâne Yenikapısı dâhilinde el-Hâc Evliyâ mahallesinde mütemekkin Bakkāl Filibon v. Dimo nâm zimmî meclis-i şer‘-i hatîr-i lâzımü’t-tevkīrde müderrisîn-i kirâmdan bâ‘isü hâze’l-kitâbi’l-müstetâb Abdullah Efendi b. el-mevlâ el-merhûm İbrahim Efendi mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Hacı Yahya Efendi menzili ve bir tarafdan Çorbacı İbrahim Ağa menzili ve bir tarafdan Hallâlî Mehmed Ağa menzili ve bir tarafdan tarîk-i âm ile mahdûd fevkınde iki bâb harâb oda ve tahtında bir mikdâr havluyu müştemil dört kepenk bir bâb bakkāl dükkânı ile derûnunda mevcûd beyne’l-hıref gedik ta‘bîr olunur iki terâzî ma‘a derâhim ve üç kantar ve beş fıçı ve beş tabla ve bir akçe tahtası ve iki tencere ve beş sahan ve bir tâbe ve iki destgâh ve sâir âlât-ı lâzıme-i ma‘lûme yüz yirmi sehm i‘tibârıyla kırk beş sehmi Meloto bt. Sava Nasrâniyenin ve otuz sehmi Anaştaşya Nasrâniyenin ve kırk beş sehmi dahi benim yedimizde mülkümüz olmağın dükkân-ı mezkûr zikr olunan eşyâ-i muharrere ve sâir âlât-ı lâzıme-i ma‘lûmeden ber-vech-i muharrer mâlik olduğum kırk beş sehmimi tarafeynden îcâb ve kabûlü hâvî bey‘-i kat‘î ve safka-i vâhide ile mûmâ-ileyh Abdullah Efendi’ye beş yüz guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr beş yüz guruşu mûmâ-ileyh Abdullah Efendi yedinden tamamen ahz ü kabz eyledim, ba‘de’l-yevm dükkân-ı mezkûr müstakıllen ve mârrü’z-zikr gedik ta‘bîr olunan eşyâ-i muharrere ve sâir âlât-ı lâzıme-i ma‘lûmenin kırk beş sehmi mûmâ-ileyh Abdullah Efendi’nin mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a. Fî 28 min-S sene 1197 Şühûdü’l-hâl: Mehmed Salim Efendi b. Hüseyin, Seyyid Ali Efendi b. Halil, Numan Efendi b. Süleyman, Molla Ali b. Halil, Hacı Hasan b. Osman ve gayruhum.