Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 282 Hüküm no: 286 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Mehmed Efendi’nin esamesini Hüseyin b. Yusuf’a devretmesi Esâme kasr-ı yedi Mahmiye-i İslâmbol’da Cafer Ağa mahallesinde sâkin Mehmed Efendi b. Mehmed nâm kimesne meclis-i şer‘-i şerîf-i enverde işbu bâ‘isü’l-vesîka Hüseyin b. Yusuf nâm kimesne mahzarında ikrâr ve takrîr-i kelâm edip benim Sipâh Ocağı’nda Üçüncü Bölük’de Mehmed nâm ismiyle mutasarrıf olduğum yevmî elli dokuz akçe esâmîmi bundan akdem hüsn-i rızâ ve ihtiyârımla mezbûr Hüseyin’e ferâğ ve bi’l-külliye kasr-ı yed edip ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an dokuz yüz guruş def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Hüseyin’in zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr dokuz yüz guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 18 Ra sene 1197 Şühûdü’l-hâl: Ebûbekir Ağa b. İsmail, Za‘îm Hasan Ağa b. Ebîbekir, el-Hâc Ali Çavuş Ağa b. Mehmed, es-Seyyid Mehmed Çavuş Ağa b. ( ), Molla Ali b. Halil, Salih b. Halil, Hacı Hasan b. Osman.