Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 283 Hüküm no: 288 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Ayşe bt. Ahmed’in kocasından boşanması Muhâla‘a, vekâleten Mahmiye-i İslâmbol’da Cafer Ağa mahallesinde sâkine Âişe bt. Ahmed nâm hatun tarafından ber-vech-i âtî hul‘ ve ibrâya vekîl olduğu zât-ı mezbûreyi ârifân mahalle-i mezbûre imâmı el-Hâc Ali Efendi b. Mehmed ve Salih b. Halil nâm kimesneler şehâdetleriyle sâbit olan Bekçi Ömer b. Mehmed nâm kimesne meclis-i şer‘-i şerîf-i enverde müvekkile-i mezbûrenin zevc-i dâhili işbu bâ‘isü’l-kitâb Süleyman b. Ahmed nâm kimesne mahzarında bi’l-vekâle ikrâr ve takrîr-i kelâm edip mezbûr Süleyman müvekkilem mezbûrenin zevc-i dâhili olup lâkin beynlerinde hüsn-i mu‘âşeretleri olmamağla zimmetinde mütekarrer ve ma‘kūdun-aleyh olan beş guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi müvekkilem mezbûrenin kendi üzerine olmak üzere zevci mezbûr Süleyman ile ben muhâla‘a-i sahîha-i şer‘iye ile bi’l-vekâle muhâla‘a eylediğimde mezbûr Süleyman dahi hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan mezbûr Süleyman’ın zimmetini bi’l-vekâle ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i da‘vâdan müvekkilem mezbûre Âişe Hatun’un zimmetini ibrâ ve ıskāt edip herbirimiz ber-minvâl-i muharrer bi’l-asâle ve bi’l-vekâle âharın ibrâsını kabûl eyledik dedikde gıbbe’t-tasdîki’ş-şer‘î. Fî 17 Ra sene 1197 Şühûdü’l-hâl: Şâhidûn-ı sâbıkūn.