Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 470 Hüküm no: 532 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi mahallesinde ölen Manil v. Serkiz’in vârislerinin yanmış ev arsasını yine vârislerden Oskohi Nasrâniye’ye sattıkları Arsadan hisse mübâya‘ası Mahmiye-i İslâmbol’da Sulu Manastır kurbünde Abdi Çelebi mahallesinde mütemekkin iken bundan akdem hâlik olan Manil v. Serkiz nâm zimmînin verâseti zevce-i menkûha-i metrûkesi Aksebet bt. Kara nâm Nasrâniye ile sulbî kebîr oğlu Serope zimmîye ve sulbiye kebîre kızı Oskohi nâm Nasrâniyeye münhasıra ve mesele-i mîrâsları yirmi dört sehm i‘tibârıyla üç sehmi zevcesi mersûme Aksebet Nasrâniyeye ve on dört sehmi oğlu merkūm Serope zimmîye ve yedi sehmi kızı mersûme Oskohi Nasrâniyeye isâbeti tahakkukundan sonra merkūm Serope zimmî ile anası şahsı ba‘de’t-ta‘rîfi’ş-şer‘î mersûme Aksebet Nasrâniye meclis-i şer‘-i şerîf-i enverde kezâlik şahsı mu‘arrefe olan işbu hâmiletü’r-rakīm mersûme Oskohi Nasrâniye muvâcehesinde her biri ikrâr ve takrîr-i kelâm edip mahalle-i mezbûrede vâki‘ bir tarafdan ba‘zen Serkiz zimmî ve ba‘zen müşteriye-i mersûme arsaları ve bir tarafdan Papa Aleksan zimmî arsası ve bir tarafdan ba‘zan müşteriye-i mersûme ve ba‘zen Bedros zimmî arsaları ve bir tarafdan tarîk-i âm ile mahdûd ve bir bi’r-i mâyı müştemil terbî‘an yüz on zirâ‘ bir bâb muhterik mülk menzil arsası mûrisimiz mesfûr Manyal zimmînin hayatında ile’l-helâk bâ-hüccet-i şer‘iye şirâen yedinde mülk ve hakkı olup ba‘de helâkihî arsa-i mezkûre bizimle mersûme Oskohi Nasrâniyeye mevrûs olmağın biz arsa-i mahdûde-i mezkûreden ber-i‘tibâr-ı mezkûr mâlikler olduğumuz on yedi sehm hisse-i şâyi‘amızı tarafeynden îcâb ve kabûlü hâvî bey‘-i bâtt-ı sahîh-i şer‘î ile mersûme Oskohi Nasrâniye yetmiş guruşa bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yetmiş guruşu mersûme Oskohi Nasrâniye yedinden bi-kadri’l-hısas tamamen ahz ü kabz eyledik, ba‘de’l-yevm arsa-i mahdûde-i mezkûrenin on yedi sehm-i şâyi‘inde bizim kat‘a [alâka] ve medhalimiz kalmayıp mersûme Oskohi Nasrâniyenin müstakılleten mülk-i sahîh ve hakk-ı sarîhi olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî 26 min-C sene 1197 Şühûdü’l-hâl: Molla Ali b. Halil, Ali Ağa b. Mehmed, Papa Kabril v. ( ), Papa Malhan v. ( ), Kuyumcu Karabet v. ( ) ve gayruhum.