Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 492 Hüküm no: 563 Orijinal metin no: [81a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe adlı küçük kıza Makrihora köyünde vefat eden babası Mahmud b. Ali’den kalan vakıf evdeki hissesini ferağı için annesine izin verildiği Vakıf menzili âhara ferâğa vasîye izin Havâss-ı refî‘a kazâsına muzâfe Makrihora nâm karyede sâkin iken bundan akdem vefât eden Mahmud b. Ali’nin sulbiye sagīre kızı Şerife Âişe’nin vâlidesi ve tesviye-i emrini rü’yete kıbel-i şer‘den mansûbe vasîsi mu‘arrefetü’z-zât işbu bâ‘isetü’l-kitâb Şerife Âbide Hatun bt. Abdullah meclis-i şer‘-i hatîrde bi’l-vesâye takrîr-i kelâm ve bast-ı merâm edip merhûm Sabih Ali Efendi Vakfı müsakkafâtından olup karye-i mezbûrede vâki‘ ma‘lûmü’l-hudûd ve’l-müştemilât bir bâb menzilin sekiz sehm i‘tibârıyla altı sehmi benim ve birer sehmden iki sehmi vasîsi olduğum sagīr-i mezbûre ile sadriye kebîre kızım Şerife Ârife nâm hatunun bi’l-icâreteyn taht-ı tasarrufumuzda olup lâkin benimle kızım Şerife Ârife Hatun menzil-i mezkûrda olan yedi sehm hissemizi âhara ferâğ murâd edip sagīre-i mezbûrenin hissesini ifrâz mümkün olmadığından mâ‘adâ menzil müşrif-i harâb ve mâil-i türâb olmağla bizim ve sagīre-i mezbûrenin ta‘mîr ü termîme dahi iktidârımız olmayıp bekāsı sagīre-i mezbûreye muzır ve sagīre-i mezbûrenin menzil-i mezkûrda olan bir sehmden mâ‘adâ mâlı dahi olmayıp nafaka ve kisveye ihtiyâcı olmağla menzil-i mezkûrda olan bir sehm hissesi bizim yedi sehm hissemiz ile mâ‘an bedel-i misli ve bâ-ma‘rifet-i mütevellî âhara ferâğ ve kabz-ı bedel ve bedeli istirbâh olunup sagīre-i mezbûreye infâk ve iksâ olunmak her vechile evlâ ve enfa‘ olduğuna binâen kıbel-i şer‘den bana izin verilmek bi’l-vesâye matlûbumdur dedikde hakīkat-i hâl mukırre-i vasîyy-i mezbûrenin takrîr-i meşrûhası üzere olduğu zeyl-i kitâbda muharrerü’l-esâmî bî-garaz Müslimîn ihbârlarıyla zâhir olmağın sagīre-i mezbûrenin menzil-i mezkûrda olan bir sehm hissesini âhara ferâğa vasîyy-i mezbûre Şerife Âbide Hatun’a kıbel-i şer‘den izin verilmeğin mâ-vaka‘a bi’t-taleb. Fî 10 min-B sene 1197 Şühûdü’l-hâl: Es-Seyyid Salih b. İbrahim, Mustafa b. Ali, Molla Ali b. Halil.