Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 550 Hüküm no: 684 Orijinal metin no: [91b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin kasap Hıristo’dan aldığı etlerin parasını ödemesi Mahmiye-i İslâmbol hısnı ebvâbından Yedikulekapısı hâricinde mütemekkin kasab ustalarından Hıristo v. Panayot nâm zimmî yazıcı miyânında Abdullah Efendi mübâşeretiyle Davudpaşa Mahkemesi’nde meclis-i şer‘e ihzâr etdirdiği yine tâife-i mezbûre kanadârlarından Osman Beşe b. Ahmed nâm kimesne mahzarında mezbûr Osman Beşe mukaddemâ bi’d-defa‘ât yedimden ve mâlımdan iştirâ ve kabz ve âhara bey‘ eylediği vezn ve fiyâtı beynimizde ma‘lûm lahm-ı ganem semeninden ba‘de külli’l-hesâb bin beş yüz guruş alacak hakkımın beş yüz guruşunu bundan akdem mezbûr Osman Beşe <> yedinden ahz ü kabz edip bin guruş zimmetinde bâkī alacak hakkım kalıp hattâ meblağ-ı bâkī-i mezbûr bin guruş hâlâ zimmetinde bana deyni olduğunu işbu târih-i i‘lâm günü mahmiye-i mezbûrede Kādıasker Câmi‘-i şerîfi kurbünde kâin hâlâ kasabbaşı ser-bevvâbîn-i dergâh-ı âlî Mehmed Ağa’nın konağında huzûr-ı Müslimînde ikrâr ve işhâd dahi etmekle meblağ-ı bâkī-i mezbûr bin guruşu mezbûr Osman Beşe’den hâlâ taleb ederim deyü ba‘de’d-da‘vâ ve’l-istintâk mezbûr Osman Beşe dahi cevâbında fi’l-hakīka müdde‘î-i merkūm Hıristo zimmî yedinden bi’d-defa‘ât lahm-ı ganem iştirâsını ikrâr lâkin müdde‘î-i merkūm ile hesâbımızı rü’yet etmemiş idi deyü ikrâr-ı meşrûhunu inkâr etmeğin müdde‘î-i merkūm Hıristo zimmî ber-vech-i muharrer müdde‘âsını lede’t-tezkiye adâletleri zâhir olan kasab kethudâsı el-Hâc Mehmed b. Mustafa ve yiğitbaşıları Derviş Mehmed b. Ali nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı bâkī-i mezbûr bin guruşu müdde‘î-i merkūm Hıristo zimmîye edâ ve teslîme mezbûr Osman Beşe’ye tenbîh olunduğu ba‘de’t-tescîl bi’l-iltimâs huzûr-ı âlîlerine. Fî 24 min-Ra sene 1197