Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 593 Hüküm no: 777 Orijinal metin no: [97b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketlerinden dolayı Abdullah, Hafize, Zeliha ve Mehmed’in Koca Mustafa Paşa mahallesinden çıkarılmaları İslâmbol’da Koca Mustafa Paşa mahallesinde imâm vekîli Hafız Mustafa Efendi b. Mehmed ve ahâlisinden es-Seyyid Kasım b. el-Hâc Osman ve Hüseyin b. Ömer ve Derviş Mehmed Emin b. Mustafa ve diğer Hüseyin b. Mehmed ve es-Seyyid Mehmed b. Ömer nâm kimesneler Davudpaşa Mahkemesi’ne ihzâr etdirdikleri Abdullah b. Hasan nâm kimesne mahzarında mezbûr Abdullah ve gāibûn ani’l-meclis zevcesi Hafize bt. Abdullah ve kızı Zeliha ve dâmâdı Mehmed mahalle-i mezbûrede vâki‘ Hanım odaları demekle ma‘rûf müte’ehhilîn odalarında bir menzilde sâkinler olup [98a] lâkin kendi hâllerinde ırzıyla mukayyed olmayıp dâimâ civârında olan komşulara envâ‘-ı şütûm-ı galîza şetm âdet-i müstemirresi olduğundan mâ‘adâ mezbûretân Hafize ve Zeliha hatunların dahi nâ-mahremden ictinâbları olmamağla mezbûrûna bundan akdem defa‘âtle tenbîh olundukda bir dürlü mütenebbihler olmayıp ef‘âl-ı kabîhalarında ısrâr ve bu vechile cümlemiz müte’ezzî ve mutazarrır olmamızla mezbûrûn Abdullah ve Hafize ve Zeliha ve Mehmed mahallemizden ihrâc ve âhar mahalleye nakl olmalarına tenbîh olunmak matlûbumuzdur deyü her biri mezbûr Abdullah <> ile mezbûretân Hafize ve Zeliha hatunların sû-i hâl üzere olduklarını mezbûr Abdullah muvâcehesinde haber ve mezbûrûnun mahalle-i mezbûreden çıkıp âhar mahalleye nakl olunmaları bâbında fermân-ı âlî istid‘âsında olduklarında mezbûr Abdullah dahi târih-i i‘lâmdan on güne değin mezbûrûn Hafize ve Zeliha ve Mehmed ile mahalle-i mezbûreden çıkıp âhar mahalleye nakletmek üzere ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 3 min-Recebi’l-ferd sene 1197