Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 142 Hüküm no: 79 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayazmend kazasındaki Eğribucak köyü ve tevabii mukataasının Dergâh-ı âli yeniçerilerinden Mehmed Bey’e verildiği Haremeyn-i Şerîfeyn -şerrefehallâhu te‘âlâ- Evkāfına nezâretleri olan iftihârü’l-havâs ve’l-mukarrebîn muhtâr-ı ashâbü’l-izzi ve’t-temkîn mu‘temedü’l-mülûk ve’s-selâtîn enîsü’l-ha[z]reti’l-aliyye celîsü’d-devleti’s-seniyye ve zü’l-kadri’r-refî‘ ve’l-câhi’l-menî‘ el-mahfûf bi-sunûfi avâtıfi’l-meliki’l-a‘lâ el-Hâc Mustafa Ağa b. Abdülkadir hazretleri meclis-i şer‘-i hatîrde işbu hâmilü’l-kitâb Dergâh-ı âlî yeniçerilerinden Mehmed Bey b. Mehmed nâm korucu muvâcehesinde ta‘bîr ani’l-merâm edip evkāf-ı mezbûreden vilâyet-i Anadolu’da Karesi sancağında Ayazmend kazâsında vâki‘ Eğribucak eşher karyesi ve Kâfiruğrusu ve tevâbi‘i mukāta‘ası bundan akdem bin yirmi bir Martı’ndan sene gāyetine varıncaya ber-vech-i emânet mutasarrıf olan el-Hâc İbrahim nâm cündînin senesi tamâm olup ve emânet vechi üzere zabt olunmakda izin olmamak ile ber-vech-i maktû‘ verilmek lâzım gelmeğin mezbûr Mehmed Bey senede mütevellî ve kâtib vazîfeleri olan beşer bin akçeden mâ‘adâ kırkar bin akçeye ve her senenin mahsûlünü cânib-i vakfa mukaddem edâ edip ba‘dehû zabta mübâşeret etmek şartıyla mukāta‘a-i mezbûreye tâlib oldukda nezâretim hesebi ile mukāta‘a-i mezbûrenin a‘şâr-ı şer‘iyye ve rüsûm-ı örfiyye ve cürm [ü] cinâyet ve bâd-ı hevâ ve mâl-ı gāib ve mâl-ı mefkūd ve bi’l-cümle kadîmden vakf için zabt olunan mahsûlâtı işbu yirmi iki Muharremi’nde vâki‘ Mart ibtidâsından mütevellî ve kâtib vazîfeleri olan beşer bin akçeden gayrı her senede kırkar bin akçe hesâbınca cem‘an yüz otuz bin akçeye üç sene tamâmına değin mezbûr Mehmed Bey’e deruhde ettim ol dahi kabûl ve ta‘ahhüd eyledi şol şart üzere ki her senenin mahsûlünü mukaddem cânib-i vakfa edâ edip ve sene-i evvelinin mahsûlü olan kırk bin akçeyi mezkûr Mehmed Bey yedinden bi’t-tamâm vakf için ahz u kabz ettim dediklerinde mezbûr Mehmed Bey mûmâ-ileyh ağa hazretlerini takrîrât-ı meşrûhalarında vicâhen tasdîk ve şifâhen tahkīk edicek mâ-hüve’l-vâkı‘ bi’t-taleb ketb olundu. Tahrîren fî-evâsıtı şehri Cemâziyelûlâ li-sene isneyn ve ışrîn ve elf. Şühûdü’l-hâl: Fahrü’l-emsâl Hüseyin Efendi Kâtib-i Dîvân-ı âlî, fahrü’l-emâcid Ahmed Efendi el-muhâsebe, fahrü’l-emâcid Süleyman Ağa kethüdâ-yı Dârüssaâde, Hamza Bey b. ( ) el-bevvâb, Ali Bey b. ( ) el-bevvâb, Mehmed Bey b. ( ) el-bevvâb.