Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 335 Hüküm no: 290 Orijinal metin no: [88b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn-i Şerîfeyn Vakfı’nın bina satın alması Elhamdülillâhi’llezî ehalle’l-bey‘a ve harreme’r-ribâ ve’s-salâtü ve’s-selâmü alâ-resûlihî Muhammedin el-Mustafa ve alâ-âlihî ve ashâbihi’llezîne hüm nücûmü’l-hedyi ve ba‘d, işbu mazmûnunda vakıf ikrârından bahseden sahîh ve şer‘îh bir hüccettir. Mahmiye-i Kostantıniyye mahallâtından Çelebioğlu mahallesi sükkânından Salamon ve Lazar ve Yasef evlâd-ı Yakova nâm Yahudiler meclis-i şer‘-i şerîf-i garrâya hâzırûn olup her birisi şöyle ikrâr ve i‘tirâf ettiler ki, işbu akdin kendilerinden sudûruna kadar mâliki oldukları ve taht-ı tasarruflarında bulundurdukları, medîne-i Üsküdar’da merhûme Gülfam Hatun evkāfından olup vakf-ı mezbûra iki bin sekiz yüz akça mukāta‘ası bulunan mahalle-i mezbûrede vâki‘ arsa üzerinde kâin, on beş bâb fevkānî ve tahtânî hâneyi müştemil, hudûdu bir tarafından Ömer Ağa Vakfı, bir tarafından Hayim mülkü, tarafeynden de tarîk-ı âm ile mahdûd bulunan cemî‘ ebniyeyi râyicü’l-vakt üç yüz altmış bin akçe semen-i mu‘ayyen-i makbûzla, Haremeyn-i Şerîfeyn Evkāfı nâzırı olan Dârüssa‘âde ağalığı hizmetiyle müşerref iftihârü’l-havâs ve’l-mukarrebîn el-mahfûf bi-sunûfi avâtifi’l-meliki’l-mu‘în İsmail Ağa b. Abdülmuin cânibinden iştirâ ve tasdîka vekâleti bi-mâ hüve tarîku’s-sübût şer‘an sâbit olan, mahmiye-i mezkûrede vâki‘ Haremeyn-i Şerîfeyn Evkāfı muhâsibi hâfız-ı hâze’l-kitâb Ahmed Efendi b. Mehmed’e bey‘ eylediler. O dahi vekâlet-i hasebiyle ve Dârü’l-aliyye-i şerîfe ağalarından merhûm Abbas Ağa vakfı mâlıyla, vâkıf-ı mezbûrun vakfiyesinde mevcûd, mu‘teber bir mahalde, istiğlâl ve istismâra sâlih bir akār iştirâ edilmesi ve icâre-i mu‘tâde ile icâreye verilip hâsıl olan ücret-i kirânın Medîne-i münevvere fukarâsına irsâli şartı mûcibince ebniye-i mezbûreyi iştirâ eyledi. Vâki‘ ikrâr vekîl-i mezbûr tarafından bi’l-müvâcehe tasdîk edildi. İşbu mubâya‘a, hâkim-i hâsim-i muvakkı‘ a‘lâhu el-mutevakkı‘ rızâi rabbihî mevlâhu indinde akd-i mezkûrun vakfa nâfi‘ olduğu zâhir ve sâbit olmasından sonra vukû‘ buldu. Cerâ zâlike ve hurrire fî-evâsıtı Recebi’l-esam li-sene ihdâ ve selâsîn ve elf. Şühûdü’l-hâl: Kasım Ağa b. Abdullah el-bevvâb, Mehmed Ağa b. Ca‘fer el-bevvâbü’s-sultânî, İshak Efendi el-bevvâb, İsmail Çelebi b. el-bevvâb, Mehmed Ağa b. Reisü’l-mi‘mârîn, Hasan Ağa b. Türâb, Mustafa b. Mehmed