Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 95 Hüküm no: 10 Orijinal metin no: [2a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polihroni v. Aleksandra’nın cizye ve bedel-i avârızdan muaf olduğu Havâss-ı aliyye kazâsına tâbi‘ Litroz nâm karye zimmîlerinden Dimitri v. Yani ve Panayot v. Yani ve Kosta v. Hristo nâm zimmîler meclis-i şer‘-i hatîr-i lâzımü’t-tevkīrde işbu bâ‘isü’s-sifr Polihroni v. Aleksandra nâm zimmî muvâcehesinde her biri üzerine da‘vâ ve takrîr-i kelâm edip mezbûr Polihroni karye-i mezbûre ahâlîsinden olup işbu bin yetmiş yedi senesine mahsûb olmak üzre üzerine edâsı lâzım gelen cizye ve bedel-i avârız ve sâir tekâlîfi bizimle ma‘an edâdan imtinâ‘ eder, suâl olunsun dediklerinde gıbbe’s-suâl mezbûr Polihroni cevâbında ben mîrî suyolcu tâifesinden olup saray-ı havâssa bahçeye cârî olan su yollarına bilâ-ücret hizmet etmeğin hizmetim mukābelesinde beher sene edâsı lâzım gelen cizye ve bedel-i avârız ve sâir emr-i şerîfle vâki‘ olan tekâlîf-i örfiyyeden mu‘âf ve müsellem olmak üzre yedime berât-ı şerîf-i âlîşân verilmişdir deyû berât-ı şerîf-i âlîşân ibrâz edip mazmûnu min külli’l-vücûh takrîr-i meşrûhuna muvâfık olmağın mûcebince mezbûr Polihroni bî-vech mu‘ârazadan mezbûrûn Dimitri ve Panayot ve Kosta men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrü Bey b. Mustafa, İbrahim b. Ahmed, Mehmed b. Hızır ve gayruhüm.