Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 75 Hüküm no: 37 Orijinal metin no: [21-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berlin’de ölen Corci Yukazbozdic’den küçük çocuklarına intikal eden debbağhane hisselerinin satışına izin verilmesi Mehmed Mecid, izin: 1 kıt‘a Numara: 126, 172,5 guruş Almanya Devleti’nin pây-ı tahtı olan Berlin’de sâkin iken bundan akdem fevt olan devlet-i müşârün-ileyhâ teba‘asından Corci Yukazbozdic? v. Atam’ın sulbî sagīr oğlu Diyohan? ve sulbiye sagīre kızı Markarine’nin tesviye-i emrlerine taraf-ı sefâretden vasî nasb olunup kıbel-i şer‘den dahi vesâyeti re’y olunan işbu bâ‘isü’r-rakīm Mösyö Gali v. Cak m. bi’l-vesâye takrîr-i kelâm edüp Hazîne-i Haremeyn-i Muhteremeyn’den mazbût evkāfdan Ayasofya-i Kebîr Vakfı musakkafâtından mahmiye-i İstanbul hısnı ebvâbından Yedikule hâricinde İskele meydanında vâki‘ yirmi numara ile murakkam ma‘lûmü’l-hudûd ve’l-müştemilât senevî on dört guruş icârelü terbî‘an dört yüz on altı zirâ‘ mukaddemâ bir kıt‘a arsa ve el-yevm bir bâb debbâğhâne müteveffâ-yı merkūmun sağlığında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı merkūmân ile sulbî kebîr oğlu Firederik ve sulbiye sagīre kızları Zedekine ve Anorya ve Vidane ve Marya’ya hasbe’l-âde isbâ‘an intikāl edüp lâkin debbâğhâne-i mezkûre ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı merkūmân haklarında muzır ve gayr-ı müfîd olduğundan mâ‘adâ kibâr-ı merkūmûn hisselerini âhara ferâğ murâd etmeleriyle ma‘an bedel-i misliyle bâ-re’y-i mütevellî âhara ferâğ ve bedeli ahz ü kabz birle irbâh ve istirbâh olunmak sagīrân-ı merkūmân haklarında her vechile enfa‘ ve evlâ olduğuna binâen yedimde olup sefâret-i müşârün-ileyh tarafından memhûr bi’l-i‘tâ Hâriciye Nezâret-i celîlesinden tasdîk olunan bir kıt‘a takrîr mûcebince sagīrân-ı merkūmânın debbâğhâne-i mezkûrede olan hisse-i şâyi‘alarını konsoloshâne vâsıtasıyla istifâ ve temîn olunan yüz dört aded lira-yı Osmânî yirmi sekiz guruş mukābelesinde bâ-re’y-i mütevellî âhara ferâğa izin taleb şüd. Fî 17 Zilka‘de sene [1]300 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Kadri ve gayruhum.