Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 114 Hüküm no: 42 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmügülsüm bt. Himmet’in ölen Sitti bt. Kara Mahmud’un amca kızı ve tek vârisi olduğu Dârü’l-hilâfeti’l-aliyye’de Nallı Mescid mahallesinde sâkine bâ‘isetü’l-kitâb Ümmügülsüm bt. Himmet nâm hâtun dîvân-ı kāimmakām-ı sadr-ı a‘zamîde ma‘kūd meclis-i şer‘-i hatîrde mahmiye-i mezbûrede beytülmâl-i hâssa emîni olmağla mahmiye-i mezbûrede Dâye Kadın mahallesinde sâkine iken bundan akdem vefât edip Sitti bt. Kara Mahmud nâm hâtunun zâhirde vâris-i ma‘rûfu olmamak zu‘muyla terekesine bi’l-emâne vâzı‘ü’l-yed olan Osman Ağa b. Mahmud mahzarında üzerine da‘vâ ve takrîr-i kelâm edip ben müteveffât-ı mezbûre Sitti Hâtun’un li ebeveyn ammi kızı ve zât-ı rahm cihetinden verâseti bana münhasıra olup hattâ müteveffât-ı mezbûre hayâtında benim için ber vech-i muharrer vârisi olduğumu mahzar-ı müslimînde ikrâr edip musırraten alâ ikrârihî vefât etmeğin terekesi şer‘an bana isâbet etmeğin ve emîn-i mezbûr nâ-hak vaz‘-ı yed eylediği ecilden suâl olunup bana teslîme tenbîh olunmak matlûbumdur dedikde, gıbbe’s-suâl emîn-i mezbûr cevâbında tereke-i müteveffâ-yı merkūmeye bi’l-emâne vaz‘-ı yedini ikrâr, lâkin ber vech-i muharrer ikrârını inkâr edicek müdde‘iyye-i mezbûre Ümmügülsüm’den müdde‘âsına beyyine taleb olundukda udûl-i müslimînden olup mahalle-i mezbûre sükkânından Murad Ağa b. Abdullah ve mahmiye-i mezbûrede İmâm Ali mahallesi sükkânından Ahmed b. Mustafa ve Hasan b. Veli nâm kimesneler li ecli’ş-şehâde meclis-i şer‘a hâzırûn olup isre’l-istişhâd ve fi’l-vâki‘ müteveffât-ı mezbûre Sitti Hâtun hayâtında bizim huzûrumuzda müdde‘iyye-i mezbûre Ümmügülsüm için li ebeveyn ammim kızı ve hasren vârisimdir deyû ikrâr ve müdde‘iyye-i mezbûre dahi tasdîk edip musırraten aleyh vefât eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Rebî‘ilâhir li sene [10]77. Şuhûdü’l-hâl: Ebûbekir Efendi Tezkireci, Fazlullah Ağa Kethüdâ-yı kapıcıyân, Mustafa Ağa muhzırağa, Şaban Ağa muhzırbaşı.