Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 157 Hüküm no: 234 Orijinal metin no: [25b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zâhide bt. Üveys’in evini Hüseyin Bey Vakfı’na bey‘ bi’l-istiğlâl ile sattığı Zâhide bt. Üveys meclis-i şer‘-i şerîfde ikrâr edip kendisine âid mülkü olan Kostantıniyye el-mahmiyye mahallâtından Draman yakīnlerinde Kefeli mahallesinde vâki‘ iki beyt-i süflîyi ve bir beyt-i ulvîyi ve bir su kuyusunu ve zât-ı eşcâr-ı müsmire cüneyneyi muhtevî Agane bt. Loranca ez-zimmiye mülkü ve mescid ve tarafeynden tarîk-i âm ile mahdûd cemî‘ menzilini bi-cümleti’l-hudûd ve kâffeti’l-hukūk mikdârı fıddî râyic fi’l-vakt üç bin akçe semen-i mu‘ayyen-i makbûza hâmil-i hâze’l-kitâb Hüseyin Bey vakfı’na mütevellî olan Sefer Halîfe b. Mehmed’e îcâb ve kabûl-i mer‘iyyeyn ile tarafeynden tekābuzu müştemil bey‘ ve iştirâ-i bâtteyn-i sahîhayn-i şer‘iyyeyn ile bey‘ etmeğin ol dahi vakf-ı mezbûr malı ile andan iştirâ eyleyip tahliyye ve tekābuzdan sonra işbu kitâbın zeylindeki târih-i şehr gurresinden sene-i kâmile tamâmına değin müddet-i mezbûrede mikdârı üç yüz yetmiş beş akçe mezbûrü’n-na‘t ücret-i mu‘ayyeneye andan istîcâr eyledikde mütevellî dahi ana îcâr etmeğin istîcâr ve îcâr-ı sahîhayn-i şer‘iyyeyn ve ikrâr-ı sarîh-i mer‘î mütevelli’l-mezbûr kıbelinden vicâhen ve şifâhen tasdîk olunup derk-i menzile ve ücretine Mustafa b. Abdullah ve Bâli Çelebi b. Ali ve Murad b. Abdullah emr ve kabûlü hâviye kefâlet ile kefîl olmağın [kayd olundu]. Şuhûdü’l-hâl: Ferhad b. Abdullah, İsâ b. Musa, Ahmed b. Abdullah, Mehmed b. Abdullah, Ahmed b. Osman, Abdürrezzak