Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 187 Hüküm no: 291 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Kulfalı’nın câriyesini ayarttığı iddiasıyla davacı olduğu Ali b. Memi ile beş yüz akçe karşılığında sulh olduğu Medîne-i Ebâ Eyyûb el-Ensârî mahallâtından Câmi‘-i şerîf mahallesinde sâkin olan Mehmed b. Kulfalı nâm kimesne mahfil-i kazâ ve mahall-i irtizâda mahmiye-i İstanbul’da Molla Hüsrev odalarında sâkin Ali b. Memi mahzarında takrîr-i kelâm edip mezbûr Ali bundan akdem mahrûse-i Bursa’da Emine nâm câriyeyi bir mor ferâce ve bir yeşil ferâce ve bir lâciverd dolama ve don ve gömlek ve ev içinden ba‘zı esbâb ile ayarttı deyû da‘vâ edip mâbeynimizde münâza‘ât-ı kesîre ve husûmât-ı şedîde vâki‘ olup muslihûn tavassutuyla beş yüz râyic fi’l-vakt akçeye sulh edip mezbûr Ali’nin yedinden bedel-i sulh olan meblağ-ı mezbûru bi’t-tamâm aldım kabz ettim mezbûrun zimmetini ibrâ ve iskāt ettim eğer mezbûra müte‘allik da‘vâ benden veya vekîlimden sâdır olursa lede’l-hükkâmi’l-kirâm mesmû‘ olmaya dedikde mukırr-ı merkūmu ikrâr-ı meşrûhunda mezbûr Ali vicâhen ve şifâhen tasdîk edip mâ vaka‘a vukū‘u üzre bi’t-taleb kayd olundu. Şuhûdü’l-hâl: Mustafa b. Hasan, Hacı Mehmed [b.] Ali, Behram b. Abdullah, Hüsam b. Hasan, Kurd b. Abdullah, Mustafa b. Yusuf