Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 202 Hüküm no: 316 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebecibaşı Ahmed Ağa vakfı tasarrufundaki Sultan Bayezid Evkâfı arâzisinden bir buçuk evlek yerin Keyvan b. Abdullah’a altmış yıllığına kiralandığı Budur ki kıdvetü erbâbi’l-ikbâl umdetü ashâbi’l-iclâl mecma‘u’l-me’âsir ve’l-mekârim hâlâ cebeciler ağası olan Ahmed Ağa b. Abdülmennân nâm kimesnenin evkā[fına] mütevellî olan Mustafa b. Ahmed nâm kimesne meclis-i şer‘-i şerîfde bu hakīr yanında bast-ı kelâm edip mahrûse-i Kostantıniyye ebvâbından Eğrikapı hâricinde cennet-mekân, firdevs-âşiyân merhûm [ve] mağfûrun-leh Sultan Bayezid Hân -aleyhi’r-rahmetü ve’r-rıdvân- hazretlerinin evkāfına müte‘allik arâziden yılda yüz kırk sekiz akçe mukāta‘a-i mu‘ayyenesi olan sâha-i mübeyyene üzre olan ebniye ve arsa-i hâliyesinin hakk-ı karârı mûmâ-ileyh cebecibaşı yedinde ve tasarrufunda olup müslümanlara evlek evlek tevzî‘ olunması murâd olundukda zikr olunan arz-ı hâliyeden her evleği tûlen otuz zirâ‘ ve arzan yirmi beş zirâ‘ olmak üzre hudûdunun bir cânibi Aynî bt. Abdullah nâm hâtun yerine ve bir cânibi tarîk-i âma ve iki cânibi zikr olan arz-ı hâliyeye muttasıl olan bir buçuk [evlek] arz-ı hâliyeyi târih-i kitâb şehrinin gurresinden altmış yıl tamâmına varınca icâre-i tavîleyi tecvîz eden fukahâ-i üli’l-elbâb kavilleri üzre tecdîd-i müte‘âkideyne muhtâc olmaksızın her üç yılda bir akd-i cedîd olup akd-i evvelin intihâsı akd-i sânînin ibtidâsı olmak üzre mecâlis-i müte‘addidede mütevâliyeten yirmi akd ile işbu sâhibü’l-kitâb Keyvan b. Abdullah nâm kimesneye üç bin dört yüz elli akçe mukāta‘aya verip yedinden üç bin fıddî akçesin mu‘accelen alıp bâkī dört yüz elli akçeyi sâl-be-sâl yedi buçuk akçe vermeye şart eyleyip ba‘de’l-yevm her sene âhirinde lâzım olan yedi buçuk akçe mukāta‘ayı müşârün-ileyh cebecibaşının mütevellîsine verip edâ ede dedikde mukırr-ı mezkûrun akvâl-i meşrûhasını mukarrun lehü’l-mezbûr vicâhen ve şifâhen tasdîk ve tahkīk eyledikden sonra bu vesîka li ecli’t-temessük ketb olunup yed-i tâlibe def‘ olundu ki vakt-i hâcetde müzekkir-i mâ cerâ ola. Şuhûdü’l-hâl: Ahmed b. Abdullah, Receb b. Yusuf, Keyvan b. Abdullah, İbrahim b. Abdullah, Halil el-Kayyım, Hemdem b. Abdullah, İbrahim [b.] Hamza ve gayr