Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 207 Hüküm no: 326 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hâtun bt. Receb’in boşandığı kocası Sefer b. Hasan’dan dört bin akçe mehir ve nafaka alacağına ilave olarak üç bin akçe daha vererek mülk menzilini satın aldığı Mahmiye-i Kostantıniyye mahallâtından Yenipazar mahallesi sâkinelerinden Rahime Hâtun bt. Receb mahfil-i kazâda sâbıkan zevci olup hâlâ mutallıkı olan hâmil-i hâze’l-kitâb Sefer b. Hasan mahzarında ikrâr-ı sahîh-i şer‘î ve i‘tirâf-ı sarîh-i mer‘î edip mezbûr zevcimde üç bin akçe mehr-i müeccelim ve bin akçe nafaka-i iddetim var idi hâlâ mezbûra üç bin akçe dahi verip cem‘an yedi bin râyic fi’l-vakt akçe mukābelesinde medîne-i Ebâ Eyyûb el-Ensârî -aleyhi rıdvânü’l-meliki’l-Bârî- mahallâtından Veli Baba mahallesinde vâki‘ bir cânibi Seyyid Ahmed mülküne ve bir cânibi benim mülküme ve bir cânibi tarîk-i âma ve bir cânibi Bülbül Hâtun vakfı’na müntehî olup bir beyt-i süflî ve bir ahırı ve bi’r-i mâyı ve cüneyneyi müştemil olan mülk menzilini bana cemî‘ tevâbi‘ ve levâhık ile verdi ben dahi zikr olunan yedi bin akçe mukābelesinde menzil-i mezbûru kabûl eyledim ve müşârün-ileyh Sefer ile hukūk-ı zevciyyete ve gayra müte‘allik biribirimizin zimmetini cemî‘ da‘vâ ve mütâlebât ve eymân ve muhâsamâtdan ibrâ-i âm ile ibrâ ve iskāt eyledik eğer min ba‘d benden veya vekîlimden husûs-ı mezkûr ve gayra müte‘allik da‘vâ mûmâ-ileyh ile sâdıra olursa lede’l-hükkâmi’l-kirâm mesmû‘a olmaya dedikde mukırra-i merkūmeyi akvâl-i meşrûhasında mezbûr Sefer vicâhen ve şifâhen tasdîk ve tahkīk eyledikde bu vesîka sicill-i mahfûza ketb olundu. Fî evâhiri şehri Safer sene 994. Şuhûdü’l-hâl: Osman Halîfe b. Ali el-İmâm, Mustafa b. Mehmed, Hasan Halîfe b. Ali el-İmâm, Mehmed b. Alâaddin, Mustafa b. Abdi el-Müezzin, Şaban b. Süleyman, Ali b. Şaban, Mehmed b. Memi, Ahmed b. Yakub, Ahmed b. Ali, Ali Bey b. Abdülkerim, Nasuh b. Abdullah, el-Hâc Murad eş-şehîr bi-Başçı Hacı