Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 123 Hüküm no: 93 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin Kiryako v. Tetoki’ye bazı emlâkini satıp bazısının da kullanım hakkını devretmesi Vilâyet-i Rumeli’nde Mora sancağında nefs-i kazâ-i Trapoliçe’de sâkin Yani v. Yorgi nâm zimmî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Kiryako v. Tetoki nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip kazâ-i mezbûr mahallâtından Sankar mahallesinde vâki‘ bir tarafdan Yani v. Andriye Demirci mülküne ve bir tarafdan Nikola v. Petrayele mülküne ve bir tarafdan Nikola v. Sokoto mülküne ve bir tarafdan Yani [v.] Kalici mülküne müntehî iki tahtânî beyti ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve yine kazâ-i mezbûr kurbunda Krastova demekle ma‘rûf mevzi‘de vâki‘ lede’l-ahâlî ma‘lûmü’l-hudûd tahmînen iki dönüm bir kıt‘a mülk bağımı dahi cümle-i tevâbi‘ ve levâhıkı ve kâffe-i menâfi‘ ve merâfıkları ile mezbûr Kiryako’ya beş bin altı yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine kazâ-i mezbûr tarlaları sınırında vâki‘ lede’l-ahâlî ma‘lûmü’l-hudûd tahmînen diyârımız keyli ile dört keyl tohum istî‘âb eder bir kıt‘a mutasarrıf olduğum tarlanın dahi hakk-ı tasarrufu[nu] sâhib-i arz ma‘rifetiyle mezbûr Kiryako’ya tefvîz edip ol dahi minvâl-i muharrer üzre tefevvüz ve kabûl ettiğinden sonra mukābele-i tefvîzde olan dört yüz nakd-i mezbûrü’n-na‘t akçeyi mezbûr Kiryako yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ât mezkûr Kiryako’nun mülk-i müşterâ-yı sarîhidir mârrü’z-zikr bir kıt‘a tarlanın dahi hakk-ı tasarrufu mersûmundur sâir emsâli tasarrufu gibi keyfe mâ yeşâ mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Kiryako bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Mehmed, Mehmed b. Hanefi, Ali b. Abdullah, Yakub b. Kurd, Süleyman b. Turgud, Perviz b. Abdullah, Mehmed Beşe b. Abdullah er-Râcil, Ömer Beşe b. Şuca‘ er-Râcil, Yani v. Andriye, Yani v. Petrayele, Polihroni v. Dimo.