Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 250 Hüküm no: 280 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin menzilini Yani v. Yorgi ile Dimo v. Kosta’ya müşterek olarak satması Havâss-ı Aliyye kazâsı müzâfâtından Büyükçekmece nâhiyesine tâbi‘ Kalikratya nâm karye sâkinlerinden Yorgi v. Yani nâm zimmî meclis-i şer‘-i hatîr-i lâzımü’t-tevkīrde işbu hâmilân-ı hâze’l-kitâb Yani v. Yorgi ve Dimo v. Kosta nâm zimmîler mahzarında bi’t-tav‘ ve’r-rızâ ikrâr edip vilâyet-i Rumeli’nde Mora sancağında Londar kazâsına tâbi‘ Duraş nâm karyede vâki‘ bir tarafdan Yorgo v. Dimo mülküne ve bir tarafdan Nikine v. Dimitri mülküne ve bir tarafdan Makro v. Yani mülküne ve bir tarafdan vâdiye müntehî ve mahdûd bir tahtânî beyti ve bir mikdâr harâbe bahçe yerini ve bir göz su değirmenini ve bir kebe değirmenini müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûrân Yani ve Dimo’ya ale’l-iştirâki’s-seviy bey‘-i bâtt-ı sahîh-i şer‘î ile beş bin nakd-i fıddî-i Osmânî râyic fi’l-vakt akçeye bey‘ edip meblağ-ı mezbûr bin nakid akçeyi mezbûrân yedlerinden ale’l-iştirâki’s-seviy bi’t-tamâm ve’l-kemâl ahz ve kabz edip mebî‘-i mahdûdu mahallinde kabza müşteriyyân-ı merkūmânı taslît eyledim ba‘de’l-yevm sâlifü’l-beyân mebî‘-i mahdûd mezbûrân Yani ve Dimo’nun mülk-i müşterâ-yı sarîhleridir keyfe mâ yeşâân mutasarrıf olsunlar dedikde mukırr-ı mezbûrun ikrârını el-mukarru lehümü’l-mezbûrân vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî ve’l-ışrîn [min Cumâdelâhire] li târihi’l-mezbûr. Şuhûdü’l-hâl: Yusuf b. Abdullah, Ali b. Abdullah, Todoro v. Dimo, İstemad v. Yani, Yani v. Dimo, Dimo v. Dimitri ve gayruhüm.