Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 269 Hüküm no: 309 Orijinal metin no: [46b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Şaban’ın Sâliha Hâtun bt. Abdullah adlı karısını boşadığı Medîne-i Ebâ Eyyûb el-Ensârî- radiye anhu Rabbühü’l-Bârî- mahallâtından ( ) mahallesinde sâkin olan İbrahim b. Şaban nâm kimesne meclis-i şer‘-i şerîfde nikâhında ta‘ahhüd ettiği râyicü’l-vakt iki yüz elli akçe-i Osmânî mehr-i müeccelini ve yüz akçe mikdârındaki nafaka-i iddetini ödedikden sonra Sâliha Hâtun bt. Abdullah nâm zevcesini tatlîka-i vâhide ile tatlîk eylediğini ikrâr ve i‘tirâf etti. Mezbûre Sâliha, mutallık-ı merkūmundan mebâliğ-i mezkûreyi teslîm aldı. Zevce-i mezbûre vâki‘ ikrârı vicâhen ve şifâhen tasdîk etti. Zevce-i mezbûre bu sûretle yeni bir nikâh yapılmadan ve mehir ödenmeden helâl olmayacak şekilde zevc-i merkūmundan ayrılmış oldu. Sonra her biri cemî‘-i de‘âvî, mutâlebât, eymân ve muhâsamâtdan umûmen, zevciyyetle alâkalı da‘vâdan husûsen yek diğerinin zimmetini ibrâ-i âm ile husûmet ve nizâ‘ı bertaraf edecek şekilde ibrâ etti. Cerâ zâlike ve hurrire fi’t-târihi’l-mezbûr. Şuhûdü’l-hâl: Murad b. Abdullah, Yusuf b. Abdullah, Ali b. Abdullah, Mustafa b. Mehmed, Perviz b. Abdullah, Yakub b. Kurd ve gayruhüm