Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 328 Hüküm no: 402 Orijinal metin no: [72a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şem‘i Hâtun bt. Çalabverdi’nin evini Hasan b. Abdullah’a satması Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Eğrikapı hâricinde el-Hâc Hüsrev mahallesi sâkinelerinden Şem‘i Hâtun bt. Çalabverdi tarafından bey‘-i âti’l-beyânı ikrâra vekîl olup vekâleti hasm-ı şer‘î-i câhid mahzarında mezbûreyi ilm-i şer‘îyle ârifân olan Ali b. Abdullah ve Mehmed b. İbrahim şehâdetleri ile şer‘an sâbite olan zevci Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Hasan b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkile-i merkūme mahalle-i mezbûrede vâki‘ bir tarafdan Fâtıma Hâtun bt. Abdullah mülküne ve bir tarafdan benim mülküme ve bir tarafdan mekābir-i müslimîne ve bir tarafdan tarîk-i âma müntehî ve mahdûd iki fevkānî ve bir tahtânî beyti ve kenîfi ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Hasan’a beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledi ba‘de’l-yevm sâlifü’l-beyân menzil-i mahdûd merkūm Hasan’ın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde vekîl-i mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Hasan bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire li târihi’l-mezbûr. Şuhûdü’l-hâl: es-Sâbıkūn.