Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 352 Hüküm no: 439 Orijinal metin no: [78a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Cafer’in kendini nafakasız bırakıp giden Rıdvan b. Abdullah’tan boşanmış olduğu Medîne-i Hazret-i Ebâ Eyyûb-i Ensârî -râdiye anhu Rabbühü’l-Bârî- mahallâtından Zeyneb Hâtun mahallesi sâkinelerinden Ayşe bt. Cafer nâm hâtun meclis-i şer‘de takrîr-i kelâm edip hâlâ zevcim olup gāib ani’l-meclis olan Rıdvan b. Abdullah nâm kimesne târih-i kitâbdan dört ay mukaddem eğer bir dahi bilâ-nafaka ve kisve bırakıp gider isem benden talâk-ı selâse ile mutallaka ol deyû şart eylemişdi hâlâ zevcim merkūm Rıdvan beni bilâ-nafaka ve kisve bırakıp kendi Donanma-yı hümâyûn’a gitmişdir husûs-ı mezbûr hâzırûn bi’l-meclis olan ehl-i mahalleden istihbâr olunup takrîrleri tahrîr olunmak matlûbumdur dedikde mahalle-i mezbûrede imâm olan Mustafa Halîfe b. Ali ve yine mahalle-i mezbûrede müezzin olan Mehmed Halîfe ve İsmail b. Mehmed nâm kimesneler meclis-i şer‘a hâzırûn olup gıbbe’l-istihbâr her biri feth-i makāl edip cevâblarında fi’l-vâki‘ mezbûrenin zevci olup gāib ani’l-meclis olan Rıdvan târih-i kitâbdan dört ay mukaddem bizim huzûrumuzda merkūme Ayşe Hâtun’a bir dahi seni bilâ-nafaka ve kisve bırakıp gidersem benden talâk-ı selâse ile mutallaka ol dedi deyû alâ tarîki’ş-şehâde ihbâr ettikleri hıfzan li’l-makāl ketb olunup yed-i tâlibe def‘ ve vaz‘ olundu. Hurrire fî gurreti Ramazâni’l-mübârek li seneti’l-mezbûre. Şuhûdü’l-hâl: Mustafa b. Mehmed, Yakub b. Kurd, Perviz b. Abdullah, Şaban b. Yusuf, Ali b. Abdullah, Yusuf b. Abdullah.