Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 358 Hüküm no: 451 Orijinal metin no: [79a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayoti v. Efliyoni’nin bağını İlya v. Yorgi’ye satması Vilâyet-i Rumeli’nde Mora sancağında Trapoliçe nâm kasaba sâkinlerinden Panayoti v. Efliyoni nâm zimmî meclis-i şer‘de İlya v. Yorgi nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip kasaba-i mezbûre sınırında Karsuva nâm mevzi‘de vâki‘ bir tarafı müşterî-i mezbûr bağına ve bir tarafı Kostantin bağına ve bir tarafı Papa Pavli bağına ve bir tarafı tarîk-i âma müntehî tahmînen iki dönüm bağımı üç bin dokuz yüz nakd-i râyic fi’l-vakt fıddî-i Osmânî akçeye merkūm İlya’ya bey‘-i bâtt-ı sahîh-i şer‘î ile bey‘ edip kabz-ı semen-i merkūm eylediğimden sonra mebî‘-i mezbûru mahallinde kabza müşterî-i merkūmu taslît eyledim ba‘de’l-yevm sâlifü’z-zikr olan bağ merkūm İlya’nın mülk-i müşterâsıdır keyfe mâ yeşâ ve yahtâr mutasarrıf olsun dedikde mukırr-ı merkūm Panayoti’nin vech-i meşrûh üzre olan ikrârını müşterî-i mezbûr vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa Beşe b. Abdullah, Perviz b. Abdullah, İstati v. Yani, Toto v. Kilisyo, Kostantin v. Dimo, Yani v. Nikola, Kiryako v. Kosta.