Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 393 Hüküm no: 512 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Mojaki’nin tarlasının tasarruf hakkını Yani v. Köni’ye devretmesi Vilâyet-i Rumeli’nde Ergirikasrı kazâsına tâbi‘ Fraştine nâm karyeden Andriye v. Mojaki nâm zimmî mahfil-i kazâda işbu bâ‘isü’l-kitâb Yani v. Köni muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde vâki‘ bir tarafdan Saro v. ( ) bağına ve bir tarafdan manastıra ve bir tarafdan dereye ve bir tarafdan tarîk-i âma müntehî diyârımız keyli ile bir keyl tohum istî‘âb eder bir kıt‘a tarlanın hakk-ı tasarrufunu sâhib-i arz ma‘rifetiyle mezbûr tefvîz edip ol dahi tefevvüz ve kabûl ettikden sonra mukābele-i tefvîz de olan sekiz yüz nakd-i fıddî râyic fi’l-vakt akçeyi mezbûr Yani yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bir kıt‘a tarla merkūmundur, sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fî târihi’l-mezbûr. Şuhûdü’l-hâl: Ali b. Abdullah, Mustafa [b.] Mehmed, Yakub [b.] Kurd, Perviz [b.] Abdullah, Kiroş [v.] Martini, Yani [v.] Nika, Andriye [v.] Todori, İmaki v. Kika ve gayruhüm.