Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 412 Hüküm no: 546 Orijinal metin no: [91a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Dimitri’nin el koyduğu ev, bostan yeri ve çayırın Obani bt. Andriye’ye ait olduğu Kazâ-i Havâss-ı Aliyye müzâfâtından Litroz nâm karye sâkinelerinden Obani bt. Andriye nâm nasrâniye husûs-ı âti’l-beyâna vâzı‘u’l-yed olduğu şer‘an sâbite olan bâ‘isü’l-kitâb Nikola v. Dimitri nâm zimmî muvâcehesinde üzerine takrîr-i da‘vâ edip karye-i mezbûrede vâki‘ bir tarafdan hayyât Dimitri v. ( ) mülküne ve bir tarafdan Çerkez Nikola v. ( ) mülküne ve iki tarafdan tarîk-i âma müntehî iki fevkānî ve iki tahtânî beyti ve havluyu müştemil mülk menzili ve yine karye-i merkūme kurbunda vâki‘ etrâfı Yorgi v. İstemad ve Kosta v. Nikola tarlaları ve mer‘â ve tarîk-i âm ile mahdûd bir kıt‘a mülk bostan yerini ve yine cevânibi İskender Kethüdâ ve Kosta v. Ligori ve Hristo v. Yani ve Yorgi v. İstemad tarlaları ile mahdûd bir kıt‘a mülk çayırı cümle-i tevâbi‘ ve levâhıkı ile bi safkatin vâhidetin zevcim olup mukaddemâ hâlik olan Kosta v. Ligori nâm zimmî hâl-i hayâtında ve kemâl-i sıhhatinde otuz bin nakd-i fıddî-i Osmânî râyic fi’l-vakt akçeye bana bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i ma‘hûd eylediğinden sonra bin yirmi sekiz Saferü’l-muzafferi’nin evâilinde medîne-i Ebâ Eyyûb-i Ensârî -râdiye anhu Rabbühü’l-Bârî’de hilâfeten müvellâ olan Abdurrahman Efendi b. el-Müvellâ Hüsameddin Efendi’nin imzâ ve hatmini müştemil yedime hüccet-i şer‘iyye vermişiken mezbûr Nikola zikr olunan bostan yerine ve çayıra fuzûlî vâzı‘u’l-yed ve mutasarrıfdır ne keyfiyyet ile tasarruf eder suâl olunup kasr-ı yed ile tenbîh olun[ma]sın taleb ederim deyû işbu sene semân ve ışrîn ve elf mâh-ı Saferü’l-muzafferi’nin evâili ile müverrah ve merkūm Abdurrahman Efendi imzâsıyla mümzâ ve hatmi ile mahtûm hüccet-i şer‘iyye ibrâz edip nazar olundukda takrîrine mutâbık bulunup mezbûr Nikola istintâk olundukda fi’l-vâki‘ mârrü’z-zikr bostan yeri ve çayır merkūme Obani’nin zevci hâlik-i mezbûr Kosta’nın tasarrufunda olup ba‘de helâkihî vâris-i ma‘rûfu olmayıp tapuya müstahak olmağla sâhib-i arzdan tapu ile aldım ana binâen tasarruf ederin deyip mezbûr Kosta merkūme Obani’ye zikr olunan bostan ve çayırı mülkü olmak üzre hâl-i hayâtında bey‘ eylediğini ve yedine hüccet-i merkūmeyi verdiğin bi’l-külliyye münkir olıcak müdde‘iye-i mezbûreden sıdk-ı kelâmını mübeyyine beyyine taleb olundukda udûl-i müslimînden yine karye-i mezbûre kurbunda vâki‘ Ferhad Paşa bahçesine ustası fahrü’l-eşbâh Ahmed Ağa b. Abdullah ve medîne-i mezbûre sâkinlerinden Mustafa b. Mehmed ve Yakub b. Kurd ve Ali b. Abdullah nâm kimesneler li ecli’ş-şehâde meclis-i şer‘a hâzırûn olup fi’l-vâki‘ mezbûre Obani’nin zevci, hâlik-i merkūm Kosta hâl-i hayâtında mârrü’z-zikr bostan ve çayırı zevcesi mezbûre Obani’ye otuz bin nakid akçeye bey‘-i kat‘î ile bey‘ edip târih-i mezbûrda medîne-i merkūmede hilâfeten müvellâ olan Abdurrahman Efendi huzûrunda yedine bu hüccet-i şer‘iyyeyi verdi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyet-i şerâiti’l-kabûl mezbûrûnun şehâdetleri hayyiz-i kabûlde vâkı‘a oldukdan sonra mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min Zilka‘deti’ş-şerîfe li sene tis‘a ve ışrîn ve elf. Şuhûdü’l-hâl: Fahrü’l-kuzât Sinan Efendi b. Ali, Yusuf b. Abdullah Ser-bölük, Osman b. Abdullah, Hüseyin b. Abdullah, Perviz b. Abdullah el-Muhzır, Ali b. Abdullah ve gayruhüm.