Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 432 Hüküm no: 577 Orijinal metin no: [95a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi b. Hasan Efendi’nin ev, hayvan ve eşyalarını Ayşe Hâtun bt. Mehmed’e satıp tarlasının da tasarruf hakkını devretmesi Mahmiye-i Kostantıniyye’de Saraçhâne mahallesi sâkinlerinden olup Defterhâne kâtiblerinden fahrü erbâbi’t-tahrîr ve’l-kalem Mahmud Çelebi b. el-merhûm Hasan Efendi mahfil-i kazâda vâlidesi işbu hâmiletü’l-kitâb Ayşe Hâtun bt. Mehmed tarafından husûs-ı âti’l-beyânı tasdîka vekîl olup hasm-ı şer‘î-i câhid mahzarında Abdülkerim Çelebi b. Hamza ve Ferhad Bey b. Abdullah şehâdetleri ile şer‘an vekâleti sâbite olan Muhammed Efendi b. Ali Bey mahzarında bi’t-tav‘ ve’r-rızâ ikrâr ve takrîr-i kelâm edip kazâ-i Havâss-ı Aliyye müzâfâtından Terkos nâhiyesine tâbi‘ Baba Nakkāş demekle mu‘arref karyede vâki‘ bir tarafı Seyyid b. Ali Bey mülkü ve bir tarafı mer‘â ve iki tarafı tarîk-i âm ile mahdûd olan iki karşılı çatma evi ve sofalı ve taş binâlı odayı ve iki dönüm mikdârı bağı ve dört dönüm arpalığı ve bi’r-i mâyı ve bir çayırı müştemil mülk menzilimi ve vasfı ve kadri beynimizde ilm-i şer‘î birle ma‘lûm dört re’s kara sığır öküzü ve bir çift su sığırı öküzü ve bir su sığır ineği ve üç araba ve sâir âlât-ı zirâ‘at ve esbâb-ı hırâsetimi bi safkatin vâhidetin vâlidem mezbûre Ayşe Hâtun’a yirmi bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldıkdan sonra yine karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd tahmînen üç müd tohum istî‘âb eder yedi kıt‘a tarlanın hakk-ı tasarrufunu sâhib-i arz ma‘rifetiyle mezbûreye tefvîz edip ol dahi tefevvüz ve kabûl ettikden sonra mukābele-i tefvîzde olan on bin nakd-i mezbûrü’n-na‘t akçeyi mezbûre yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûr vâlidem mezbûre Ayşe Hâtun’un mülk-i müşterâ-yı sarîhidir ve mârrü’z-zikr yedi kıt‘a tarla dahi mezbûrenindir sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini vekîl-i mezbûr Mehmed Efendi bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fi’t-târihi’l-mezbûr. Şuhûdü’l-hâl: Hacı Efendi b. Yusuf el-Kadı, Musli Çelebi b. el-Hâc Emin, Yusuf Beşe b. Abdullah, kâtib Ahmed b. Abdullah, İbrahim b. Abdullah, Pîrî Bey b. Abdullah, Hüdaverdi [b.] İbrahim, Mustafa b. Mehmed, Yakub b. Kurd, Perviz b. Abdullah.