Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 448 Hüküm no: 604 Orijinal metin no: [99b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Virde’nin bağını Mihal v. İstemad’a satması Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Büyük Kerasova nâm karyede Yorgi v. Virde nâm zimmî meclis-i şer‘-i şerîfde işbu hâmilü’l-kitâb Mihal v. İstemad muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre bağları dâhilinde Françe nâm mevzi‘de vâki‘ bir tarafdan İstemad v. Dokini bağına ve bir tarafdan Panayot v. Manklar? bağına ve bir tarafdan Yani v. Yorgi bağına ve bir tarafdan ormana müntehî bir samanlığı ve şırahâneyi hâvî tahmînen on iki çapalık bir kıt‘a mülk bağımı cümle-i tevâbi‘ ve levâhıkı ile merkūm Mihal’e üç bin sekiz yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm zikr olunan bir kıt‘a bağ mezbûr Mihal’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun cârî olan ikrâr ve takrîrin el-mukarru lehü’l-mezbûr Mihal bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî 22 min Zilhicceti’ş-şerîfe sene tis‘a ve ışrîn ve elf. Şuhûdü’l-hâl: es-Sâbıkūn.