Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 74 Hüküm no: 28 Orijinal metin no: [3b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Hamza’nın evini istiğlâl ile Şeyh Sefer Efendi Vakfı’na sattığı Medîne-i Hazret-i Ebî Eyyûb el-Ensârî mahallâtından Davud Ağa mahallesinde sâkin olan İbrahim Bey b. Hamza nâm kimesne meclis-i şer‘-i şerîfde hâzır olup âtiyyü’z-zikr menzilini merhûm Şeyh Sefer Efendi vakfı’na mütevellî olan hâmil-i hâze’l-kitâb Sinan Halîfe b. Abdullah’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, merkūm İbrahim Bey’in işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede kâin bir tarafdan Solakzâde Mehmed Çelebi mülkü, diğer tarafdan tarîk-i hâs ve diğer iki tarafdan da tarîk-i âm ile mahdûd bulunan cemî‘-i mülk menzilini cümle tevâbi‘ ve levâhıkı ile râyicü’l-vakt on beş bin akçe semen-i mu‘ayyen-i makbûzla ondan iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına beş bin akçe ücret ile menzil-i mezbûru kirâya verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra mahmiye-i Kostantıniyye sur kapılarından Edirnekapı hâricinde vâki‘ Emir Buhârî mahallesinde sâkin olan Şeyh Mehmed Halîfe b. Şeyh Pîrî, menzil-i mezbûrun kirâ ücretine îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-hâmis aşere min Cumâdelûlâ sene seb‘a ve erba‘în ve elf. Şuhûdü’l-hâl: Müezzin Murtaza Halîfe b. Mehmed, Mehmed Halîfe b. Ramazan, Mustafa Çelebi b. Hasan Efendi, Mehmed Çelebi b. Hasan, Hüseyin Çelebi b. Abdi, Şeyhî Çelebi b. Hüseyin, Mehmed Dede b. Abdullah, Oruc Halîfe b. Şaban