Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 110 Hüküm no: 86 Orijinal metin no: [12b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf Bey b. Hasan’ın çiftliğini Meryem Hatun bt. Hacı Perviz’e sattığı Medîne-i Hazret-i Ebî Eyyûb el-Ensârî mahallâtından Çavuş Kasım mahallesinde sâkin el-Hâc Yusuf Bey b. Hasan mahfil-i kazâda mahmiye-i Galata müzâfâtından kasaba-i Tophâne mahallâtından Hendekbaşı mahallesinde sâkine sâhib-i hâze’l-kitâb Meryem Hâtun bt. el-Hâc Perviz tarafından husûs-ı âti’z-zikre vekîl olup hasm-ı câhid mahzarında nehc-i şer‘î üzre vekâleti sâbite olan kıdvetü’l-emâsil ve’l-akrân Hâfız Yusuf Ağa b. Abdülmennân mahzarında bi’t-tav‘i’s-sâf ikrâr ve i‘tirâf edip medîne-i mezbûre kazâsı müzâfâtından Terkos nâhiyesine tâbi‘ Tilkiköyü demekle ma‘rûfe karyede vâki‘ bir tarafı Sefer Ağazâde çiftliği ve bir tarafı Çardak köylü Ali Ağa çiftliği ve bir tarafı Osman b. Abdullah nâm kimesne mülkü ve bir tarafı tarîk-i âm ile mahdûd olup muhavvata-i dâhiliyyesi fevkānî ve tahtânî iki odayı ve fırını ve iki çatma anbarı ve iki samanlığı ve bi’r-i mâyı ve iki dönüm mikdârı çayırı ve muhavvata-i hâriciyyesi bir ahırı önünde bir tahtânî odasıyla ve yine bir ahırı önünde bir tahtânî odasıyla ve bi’r-i mâyı ve üç dönüm mikdârı bir kıt‘a bostan yerini ve dört dönüm mikdârı bir kıt‘a çayırı ve altı dönüm mikdârı bir kıt‘a bağı müştemil olup çiftlik ta‘bîr olunur mülk menzilimi ve der-anbar olan altı müd buğday ve üç müd şa‘îr ve sekiz müd alef ve altı yığın otluğu ve zikr olunan iki samanlıkda mahfûz yirmi çit samanı ve menzil-i mezbûrda mevcûd olan üç tencere ve üç ayaklı sahan ve iki tavayı ve çiftlik-i mezbûrda mevcûd olan dört re’s su sığırı ve altı re’s kara sığır öküzlerini ve üç re’s su sığırı ve on re’s kara sığır ineğini ve on re’s kara sığır düğelerini ve sekiz re’s buzağıları ve on aded kaz ve yedi aded ördek ve kırk aded tavukları ve beş mükemmel arabayı ve altı kıt‘a sapan demirini ve bir pulluk mükemmel olan eşyâyı ile ve bi’l-cümle beynimizde ilm-i şer‘î ile ma‘lûm olan âlât-ı zirâ‘at ve esbâb-ı hırâseti tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile yüz bin nakd-i râyic fi’l-vakt fıddî akçeye vekîl-i merkūm Hâfız Yusuf Ağa’ya bey‘ ve teslîm edip ol dahi vech-i muharrer üzre müvekkilesi mezbûre Meryem Hâtun için vekâleten iştirâ ve tesellüm eyledikden sonra merhûm ve mağfûr-nişân Ebü’l-feth Sultan Mehmed Hân evkāfı arâzisinden olup kadîmden çiftlik-i mezbûr ile mutasarrıf olduğumuz mevâzi‘i müteferrikada vâki‘ her biri ma‘lûmü’l-hudûd ve’l-mikdâr olup vakf-ı mezbûra senevî yüz yetmiş akçe mukāta‘ası olan sekiz kıt‘a çayırın ve yine evkāf-ı mezbûre arâzisinden olup karye-i mezbûre hudûdunda mevâzi‘-i adîdede vâki‘ kezâlik her biri ma‘lûmü’l-hudûd ve’l-mikdâr olan on beş kıt‘a tarlamın dahi hakk-ı tasarruflarını evkāf-ı mezbûre mütevellîsi ma‘rifetiyle yine mezbûr Hâfız Yusuf Ağa’ya mezbûrü’n-na‘t yirmi bin akçe mukābelesinde tefvîz edip ol dahi vekâleti hasebiyle müvekkilesi mezbûre Meryem Hâtun için tefevvuz ve kabûl eyledikden sonra semen-i mezbûr yüz bin akçe ile bedel-i tefvîz olan yirmi bin akçe ki cem‘an yüz yirmi bin akçenin elli bin akçesini nâhiye-i merkūmeye tâbi‘ Çilingir nâm karyede vâki‘ müvekkile-i mezbûre Meryem Hâtun’dan iştirâ eylediğimiz çiftliğin semeni olan elli bin akçe deynime takās edip meblağ-ı bâkī yetmiş bin akçeyi dahi vekîl-i mezbûr Hâfız Yusuf Ağa yedinden müvekkilesi merkūme Meryem Hâtun malından olmak üzre bi’t-tamâm ve’l-kemâl ahz ve kabz eyledim ba‘de’l-yevm emlâk-i mezbûre müvekkile-i merkūme Meryem Hâtun’un mülk-i müşterâsı ve mezâri‘-i merkūme ve zikr olunan çayırlar dâhil-i taht-ı tasarrufu olmuşdur, keyfe mâ teşâ’ ve tahtâr mutasarrıf olsun dedikde mukırr-ı merkūm el-Hâc Yusuf Bey’in ber vech-i meşrûh cârî olan ikrâr ve i‘tirâfını vekîl-i mezbûr Hâfız Yusuf Ağa vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Tahrîren fî evâili Cumâdelâhire li sene seb‘a ve erba‘în ve elf. Şuhûdü’l-hâl: Fahrü’l-akrân mukāta‘acı Mehmed Efendi eş-şehîr bi Mübâşirzâde, Zahrü’l-a‘yân Mustafa Çelebi b. Osman Ağa Ser-kasabân, Mehmed Bey b. Abdullah Kethüdâ-yı kasabân, el-Hâc Mehmed Bâzirgân Bostancıbaşı, İbrahim Çelebi b. Mehmed Çelebi Attârzâde, Fahrü’l-eşbâh Hüseyin Ağa Galata voyvodası, Mehmed Efendi Kâtib-i Gümrük, Receb Efendi b. Abdi, Hasan Çelebi b. Abdullah, el-Hâc Derviş el-Kasab, Yusuf Bey b. Abdullah, Mustafa b. Abdullah, Mehmed Efendi b. el-Hâc Hayreddin, Mustafa Beşe eş-şehîr bi ...?, Mustafa Beşe b. Mahmud Çukadâr, Yakub b. Kurd, Mustafa b. Veli, Cafer b. Abdullah.