Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 208 Hüküm no: 231 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanaki v. Dimitri’nin bağını Dido v. Kika’ya sattığı Havâss-ı Aliyye kazâsı müzâfâtından Küçükköy demekle ma‘rûfe karye sâkinlerinden Yanaki v. Dimitri nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Dido v. Kika nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre sınırı dâhilinde vâki‘ işbu akdin sudûruna değin silk-i mülk-i sahîhimde münselik olan emlâkimden bir tarafdan Karagöz nâm zimmî bağı ve bir tarafdan İskarlet nâm zimmî bağı ve iki tarafdan tarîk-i âm ile mahdûd ve mümtâz ve tahmînen dört dönüm bir kıt‘a mülk bağımı mezbûr Dido’ya fıddî nakd-i râyic fi’l-vakt on üç bin yedi yüz akçe[ye] tarafeynden îcâb ve kabûlü hâvî [38b] bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr on üç bin yedi yüz akçeyi mezbûr Dido yedinden bi’t-tamâm ahz ve kabz eyledim ba‘de’l-yevm zikr olunan bağ-ı mezbûr Dido’nun mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı mezbûr Yanaki’nin minvâl-i muharrer üzre cârî olan ikrârını el-mukarru lehü’l-merkūm Dido bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min şehri Recebi’l-ferd li sene seb‘a ve erba‘în ve elf. Şuhûdü’l-hâl: Mustafa b. İdris, Abdullah b. Mustafa, Ahmed Beşe b. İslâm, Mahmud b. Ahmed, Hristo [v.] Dimo, Yani v. Duka, Kiro [v.] Apostol, Dimo [v.] Hristo, Dimo [v.] Simo, Kiro v. Niko, İstati v. Apostol.