Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 226 Hüküm no: 225 Orijinal metin no: [29a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Abdullah’ın vasiyeti için Mehmed Çelebi’yi vekil tayin ettiği Dârü’l-hilâfeti’l-aliyye Kostantıniyye el-mahmiyye mahallâtından Akseki mahallesi sâkinlerinden Hüseyin Bey b. Abdullah nâm kimesne tarafından husûs-ı âti’l-beyâna vekîl olduğu Veli Beşe b. Şükrullah ve Mehmed Çelebi b. Rıdvan ve Abdi Çelebi b. Hüseyin nâm kimesneler şehâdetleriyle şer‘an sâbit olan İbrahim Çelebi b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahalle-i mezbûre müezzini fahrü’l-akrân Mehmed Çelebi b. Ali nâm kimesne mahzarında ikrâr ve takrîr-i kelâm edip müvekkil-i mezbûr Hüseyin Bey vaktâ ki bu dâr-ı bevâr mahall-i temekkün ve karâr olmayıp nâzil olana irtihâl mukarrer ve mukīm olan intikāle muztar olduğuna câzim ve küllü nefsin zâ’ikatü’l-mevt âyet-i kerîmesi mefhûm-ı şerîfine âlim olmağın âlem-i fenâ ve şuhûddan menzil-i bekā ve hulûda rıhlet eylemezden mukaddem hulûs-ı niyet ve safâ-yı taviyyet ile etyab-ı malından ve ahsen-i menâlinden üç bin akçe ifrâz ve sâir emlâkinden mümtâz kılıp müzâfen ilâ mâ ba‘de’l-mevt şöyle vasiyyet eyledi ki bi irâdeti’l-meliki’l-celîl hazret-i Azrâil girîbân-ı hayâtımı çâk ve cism-i nâ-tuvânımın menzilgehin hâk ettiğinde meblağ-ı mezbûr üç bin akçenin iki bin akçesini techîz ve tekfînime ve bin akçesini iskāt-ı salâtıma sarf oluna deyû merkūm Mehmed Çelebi’yi vasiyy-i muhtâr nasb ve ihtiyâr edip ol dahi vesâyet-i mezbûreyi kabûl ve merâsimini edâya ta‘ahhüd eyledikden sonra meblağ-ı mezbûr üç bin akçeyi mezbûr Mehmed Çelebi’ye teslîm edip ol dahi alıp kabz eyledi dedikde gıbbe’t-tasdîki’l-vicâhî ve’t-tahkīki’ş-şifâhî mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelâhire li sene seb‘a ve seb‘în ve elf. Şuhûdü’l-hâl: Yusuf Efendi b. ( ), Ahmed Çelebi b. Sefer el-Müezzin, Ali Bey b. ( ) Tabbâh-ı hâssa, Mehmed Efendi b. ( ).