Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 396 Hüküm no: 511 Orijinal metin no: [83a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aşçıbaşı Mescidi Vakfı’nın mütevellisi Abdullah Halîfe b. Maden’in eski mütevellinin varislerinden vakıf alacağını tahsil ettiği Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ merhûm Aşçıbaşı Mescid-i şerîfinin evkāf-ı şerîfine bi’l-fi‘l mütevellî olan Abdullah Halîfe b. Maden mahfil-i kazâda bundan akdem evkāf-ı mezbûr mütevellîsi olup, vefât eden Dursun Halîfe b. Durak’ın bi’l-inhisâr vârisleri olan ashâb-ı hâze’l-kitâb zevcesi Belkıs Hâtun bt. Abdullah ve sulbiye kebîre kızı Fâtıma ve li ebeveyn karındaşı oğlu İsmail b. Mehmed mahzarlarında ikrâr-ı tâm ve takrîr-i kelâm edip mescid-i mezbûrun nukūd-ı mevkūfesinden mezbûrûn Belkıs ve Fâtıma ve İsmail yedlerinde on yedi bin nakd-i râyic fi’l-vakt fıddî akçe ve zimem-i nâsdan dahi üç bin akçe ki cem‘an kırk bin akçe tevliyyetim hasebiyle ahz ve kabz eyledim dedikde mütevellî-i merkūm Abdullah Halîfe’nin vech-i meşrûh üzre cârî ve sâdır olan ikrâr ve takrîrini mezbûrûn Belkıs ve Fâtıma ve İsmail [83b] her biri vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Şaban Halîfe b. ( ), Veli Efendi [b.] Abdullah, Ali Efendi b. Şaban, Mustafa Halîfe b. Yusuf, İbrahim b. Abdullah, Süleyman Çelebi b. Abdullah ve gayruhüm.