Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 41 Hüküm no: 13 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Said Efendi’nin Adalar naipliğine atandığı İzzet-meâb, şerî‘at-nisâb Mevlânâ İmamzâde Ahmed Said Efendi kâm-yâb. Ba‘de’t-tahiyyeti’l-vâfiye inhâ olunur ki işbu sene semân ve seb‘în ve mi’ete ve elf Cumâdelâhiresi gurresinden zabt etmek üzere cânib-i Hüsrevâneden Kuds-i Mukaddes pâyesiyle inâyet ve ihsân buyrulan medîne-i Üsküdar kazâsı muzâfâtından Adalar nâhiyesi sene-i merkūm Cumâdelâhiresi gurresinden zabt etmek üzere umûr-ı ahkâm-ı şer‘iyesi cenâbınıza tefvîz ve sipâriş olmuşdur gerekdir ki gurre-i merkūmede kazâ-i mezbûra varup beyne’l-ahâlî icrâ-yı şerî‘at-i garrâda sa‘y-i tâm ve cidd ü ihtimâm eyleyüp ve vâkı‘a olan muhallefât-ı askeriye ve belediyesin dahi tahrîr ve beyne’l-verese bi’l-farîzati’ş-şer‘iye tevzî‘ ve taksîm eyleyüp tarîk-i caddeden ser-i mû inhirâf göstermeyüp ecr-i cezîle nâil olasız ve’s-selâm. Hurrire fi’t-târîhi’l-merkūm El-Abdü’d-dâ‘î li’d-Devleti’l-aliyyeti’l-ebediyye el-Hâc Ahmed Nâşid el-Kādı bi-medîneti Üsküdar.