Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 450 Hüküm no: 599 Orijinal metin no: [95a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Yakub’un İbrahim Beşe’ye borcu olduğunu kabul ettiği Mahmiye-i Kostantıniyye’de Ayasofya-i kebîr kurbunda Fîruz Ağa mahallesi sâkinlerinden Mehmed Beşe b. Yakub nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb İbrahim Beşe tarafından tasdîk-i âti’z zikre vekîl olup hasm-ı şer‘î-i câhid mahzarında nehc-i mübîn-i şer‘î üzre vekâleti sâbite olan fahrü’l-müderrisîn Halil Efendi b. Zülfikār mahzarında bi’t-tav‘i’s-sâf ikrâr ve i‘tirâf edip gāib ani’l-meclis müvekkil-i mezbûr İbrahim Beşe’ye beynimizde vasfı ilm-i şer‘î ile ma‘lûm müşterâ ve makbûzum olan yirmi beş kara sığır ineği bahâsından ve kıymetde on dokuz bin akçe lâzımü’l-edâ ve vâcibü’l-kazâ deynimiz vardır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâlis aşer min Zilhicceti’l-harâm li sene seb‘a ve erba‘în ve elf. Şuhûdü’l-hâl: Mustafa Beşe b. Ahmed, Ahmed b. Bayram, Hüseyin b. Yusuf, Hüseyin b. Ali, Mustafa b. Veli, Yakub b. Kurd, Mehmed b. Ahmed ve gayruhüm.