Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 259 Hüküm no: 295 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Çelebi b. Kasım’ın zevcesi Ümmühân Hâtun bt. Mehmed’den karz olarak aldığı parayı ödediği ve borcuna karşılık rehin olan evinin rehinden çıkarıldığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesinde sâkine Ümmühân? Hâtun bt. Mehmed meclis-i şer‘-i şerîf-i enver ve mahfil-i dîn-i münîf-i ezherde zevci işbu râfi‘ü’l-kitâb Osman Çelebi b. Kasım mahzarında bi’t-tav‘ ve’r-rızâ ikrâr ve takrîr-i kelâm edip bundan akdem zevcim mezbûr Osman Çelebi benden karz-ı şer‘î tarîki ile yedi bin cedîd ceyyid fıddî râyic fi’l-vakt akçe ahz u kabz edip meblağ-ı mezbûr mukābelesinde mahalle-i mezbûrede vâki‘ bir tarafdan Âlime Hâtun bt. Mehmed mülkü ve bir tarafdan Fâtıma Hâtun bt. Himmet mülkü ve iki tarafdan tarîk-i âm ile mahdûd mülk menzilini cemî‘ tevâbi‘ ve levâhıkı ile ba‘de’t-tahliyyeti’ş-şer‘iyye bana rehin vaz‘ etmişdi el-hâletü hâzihî meblağ-ı mezbûr yedi bin akçeyi zevcim Osman Çelebi yedinden bi’t-tamâm ve’l-kemâl ahz u kabz ve menzil-i mezbûru rehniyyetden fek edip min ba‘d meblağ-ı mezbûr yedi bin akçeden zevcim mezbûr Osman Çelebi zimmetinde bir akçe ve bir habbe hakkım bâkī kalmadı dedikde mukırra-i mezbûrenin ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve terkīm olundu. Tahrîren fi’l-yevmi’s-sâdis min Cumâdelâhire li sene erba‘a ve hamsîn ve elf. Şuhûdü’l-hâl: Sefer Efendi b. Mustafa el-Kayyım, İbrahim Çelebi b. Musa, Mehmed Çelebi b. Ahşamcı ( ) el-Müezzin, Mehmed Çelebi b. ( ), Süleyman b. Mehmed, Abdülkerim Beşe b. Mehmed, Mahmud Çelebi b. Mehmed, Muslihiddin b. Ali, el-Hâc Mehmed b. Nasuh, Osman Beşe, Abdullah Çelebi b. Siyavuş, Mustafa Beşe el-Muhtesib, Hüseyin Çelebi mine’l-huddâm, İbrahim Çelebi min huddâm ve gayruhüm