.:: İstanbul Kadı Sicilleri ::.


Bab Mahkemesi 3 Numaralı Sicil (H. 1077 / M. 1666 - 1667)
cilt: 17, sayfa: 256
Hüküm no: 274
Orijinal metin no: [34b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sadeddin adlı birinin buğday bedelinden kalan borçlarını taksitle ödeyeceği

Navulcu tâifesinden Hüseyin Beşe b. Osman ve el-Hâc Ahmed b. Mehmed ve Musa Beşe b. Oruc ve el-Hâc Musa b. Yusuf ve Veli Beşe b. Kaplan ve el-Hâc Fazlullah b. Yusuf ve el-Hâc Halil b. Mehmed ve el-Hâc İskender b. Ali ve Yusuf Beşe b. Cafer ve Mehmed Ağa b. Yusuf ve Sarrâc Hasan b. el-Hâc Osman nâm kimesneler taraflarından husûs-ı âti’l-beyâna vekîli olduğu Mehmed b. Ebûbekir ve Mehmed b. İsmail nâm kimesneler şehâdetleriyle şer‘an sâbit olan Hasan Beşe b. Osman nâm kimesne meclis-i şer‘-i şerîf-i lâzımü’t-tevkīrde Sadeddin nâm kimesne tarafından husûs-ı âti’l-beyâna vekîl olduğu şâhidân-ı mezbûrân şehâdetleri ile sâbit olan Mustafa Beşe b. Yusuf nâm kimesne mahzarında bi’l-vekâle ikrâr ve takrîr-i kelâm edip mezbûr Sadeddin buğday bahâsından müvekkil-i mezbûr Hüseyin Beşe’ye deyni olan on dokuz bin akçeyi ve mezbûr el-Hâc Ahmed’e deyni olan altı bin altı yüz akçeyi ve mezbûr Musa Beşe’ye deyni olan sekiz bin akçeyi ve mezbûr el-Hâc Musa’ya deyni olan bin altı yüz akçeyi ve mezbûr Veli Beşe’ye deyni olan beş bin akçeyi ve merkūm el-Hâc Fazlullah’a deyni olan dört bin akçeyi ve merkūm el-Hâc Halil’e deyni olan üç bin akçeyi ve merkūm el-Hâc İskender’e deyni olan iki bin dokuz yüz akçe ve merkūm Yusuf Beşe’ye deyni olan bin beş yüz akçe ve merkūm Mehmed Ağa’ya deyni olan iki bin akçeyi ve mezbûr Sarrâc Hasan’a deyni olan bin sekiz yüz akçeyi mezbûr def‘aten edâya kādir olmayıp taksîte tâlib olmağın müvekkilûn-ı mezbûrunun cümlesi mezbûr Sadeddin târih-i kitâbdan her otuz gün tamâmında kendilere iki bin beş yüz akçe verip vech-i muharrer üzre deyni olan cem‘an elli altı bin dört yüz akçenin elli beş bin akçesini târih-i mezbûrdan altı yüz altmış gün tamâmına değin verip edâ edip ba‘dehû otuz gün tamâmında dahi bin dört yüz akçesini verip edâ etmek üzre taksît edip mezbûr Sadeddin dahi kabûl eyledi dedikde gıbbe’t-tasdîk mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min Cumâdelûlâ li sene seb‘a ve seb‘în ve elf.


Şuhûdü’l-hâl: Es-Sâbikūn.