Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 259 Hüküm no: 278 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc İbrahim’in, Numanzâde Abdurrahman Efendi’den alacaklı olduğu Efendi hazretleri imzâsıyla Mahmiye-i İstanbul’da Çoban Çavuş mahallesinde sâkin işbu sâhibü’l-kitâb el-Hâc İbrahim b. ( ) nâm kimesne dîvân-ı eyvân-ı adâlet-ünvânda ma‘kūd meclis-i şer‘-i şerîf-i Ahmedî ve mahfil-i dîn-i münîf-i Muhammedî’de şıkk-ı evvel defterdârı kāimmakāmı olmağla bundan akdem ordu-yı hümâyûnda vefât eden Numanzâde Abdurrahman Efendi’nin zâhirde vâris-i ma‘rûfu olmamağın terekesine bi’l-emâne vâzı‘ü’l-yed olan zü’l-kadri’r-refî‘ ve’l-câhi’l-menî‘ Mehmed Paşa hazretleri mahzarında üzerine da‘vâ edip müteveffâ-yı mezbûr Abdurrahman Efendi’ye hayâtında iki yüz kıt‘a esedî guruş ikrâz ve teslîm ol dahi istikrâz ve yedinden kabz ve tesellüm edip kable’l-îfâ ve’l-istîfâ fevt olmuşidi el-hâletü hâzihî meblağ-ı mezbûru tereke-i vâfiyesinden taleb ederim suâl olunsun dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Mehmed b. Osman ve Sefer b. Hasan nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr el-Hâc İbrahim bizim huzûrumuzda müteveffâ-yı mezbûr Abdurrahman Efendi’ye hayâtında iki yüz kıt‘a esedî guruş ikrâz ve teslîm ol dahi istikrâz ve yedinden kabz ve tesellüm eyledi bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra meblağ-ı mezbûru müteveffâ-yı mezbûrdan hayâtında küllen ve ba‘zen ahz ve istîfâ veya hibe veyâhud âhara havâle etmeyip turûk-ı şer‘iyyeden bir tarîk ile zimmetini ibrâ etmediğine mezbûr el-Hâc İbrahim yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire li sene seb‘a ve seb‘în ve elf. Şuhûdü’l-hâl: Es-Sâbikūn.