Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 292 Hüküm no: 340 Orijinal metin no: [69b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mustafa ile vâlidesi Emetullah bt. Ali’nin mülk evlerini Nasuh Odabaşı’ya bey‘ bi’l-istiğlâl yoluyla sattıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Zühre Hâtun mahallesi sâkinlerinden Emine bt. Mustafa nâm hâtun ile vâlidesi Emetullah bt. Ali nâm hâtun meclis-i şer‘-i şerîf-i lâzımü’t-teşrîfde Dergâh-ı âlî -dâme mahfûfen bi’l-me‘âlî- yeniçerilerine mahsûsa olan odalardan yirmi üçüncü ağa bölüğü odasında odabaşı olan işbu râfi‘ü’l-kitâb Nasuh Odabaşı b. Ali tarafından tasdîk-i câ’i’z-zikre vekîl olup bimâ hüve tarîkü’s-sübût şer‘an vekâleti sâbite olan Ramazan [b.] Mahmud nâm râcil muvâcehesinde her biri bi tav‘ihâ ikrâr-ı tâm ve takrîr-i kelâm edip ale’ş-şeriketi’s-seviy mülkümüz olup mahalle-i mezbûrede vâki‘ bir tarafdan Süleyman Dede nâm kimesne mülkü ve bir tarafdan keresteci dükkânı ve bir tarafdan vakf-ı Sinan? ve bir tarafdan tarîk-i âm ile mahdûd ve mümtâz olan mülk-i müşterek menzilimizi cümle tevâbi‘ ve levâhıkı ile müvekkil-i mezbûr Nasuh Odabaşı’na bi tarîki’l-istiğlâl altı bin cedîd akçeye bey‘ ve teslîm ol dahi mâlıyla? vech-i mübeyyen üzre iştirâ ve tesellüm ve kabz ve kabûl eyleyip semen-i mezbûr altı bin akçeyi yedinden tamâmen ahz ü kabz eylediğimden sonra yine menzil-i mahdûd-ı mezkûru ba‘de’t-tahliyeti’ş-şer‘iyye mezbûr Odabaşı târih-i kitâbdan bir sene tamâmına değin üç yüz akçe ücret ile bize îcâr ve teslîm eyledikde biz dahi vech-i muharrer üzre istîcâr ve tesellüm ve kabz ve kabûl eyledik dediklerinde mukırratân-ı merkūmetânın minvâl-i meşrûh üzre cârî ve sâdıra olan cemî‘ ikrârlarını vekîl-i mezbûr Ramazan Beşe bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-ışrîn mine’l-Muharremi’l-harâm li sene sittîn ve sittîn ve elf. Şuhûdü’l-hâl: Şaban Efendi b. Hüseyin, Mehmed Efendi b. Habil, Ali Beşe b. Mustafa, Hüseyin Beşe b. Ali, Mehmed Beşe b. Mahmud