Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 295 Hüküm no: 346 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Pîrî Tekkesi’nde Veli ile Ahmed’in birlikte zâviyedârlık yapacaklarına dâir berât Sulehâdan Veli -zîde salâhahû- arzuhâl edip Edirnekapısı hâricinde merhûm Seyyid Pîrî Tekyesi’nde otuz seneden [beri] berât-ı şerîf ile mutasarrıf iken âhardan Ahmed Efendi dahl etmekle mukarrer? ricâ etmeğin ikisi dahi ber vech-i iştirâk mutasarrıflar olmak üzre tevcîh olunup berât-ı âlîşânım verilmek fermânım olmağın işbu dârendegân-ı mezbûrân Ahmed ve Veli haklarında mezîd-i inâyet-i Pâdişâhânem zuhûra getirip ru’ûs-ı hümâyûnum sûret mûcebince ikisi dahi ber vech-i iştirâk mutasarrıflar olmak üzre bin altmış beş Şevvâlinin yirmi altıncı gününden bu berât-ı hümâyûnu verdim ve buyurdum ki mezbûrlar varıp tekye-i mezbûrede ber vech-i iştirâk zâviyedârlar olup bunlardan evvel zâviyedâr olanlar ne vechile mutasarrıf olagelmişler ise mezbûrlar dahi ol vechile mutasarrıflar olalar ol bâbda hiç ferd mâni‘ ve müzâhim olmayıp dahl ve ta‘arruz kılmaya şöyle bileler alâmet-i şerîfe i‘timâd kılalar. Tahrîren fi’l-yevmi’s-selhi Şevvâli’l-mükerrem li sene hamsin ve sittîn ve elf.