Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 55 Hüküm no: 12 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb ve Küçükçekmece’deki altı bölük yoldaşları üzerine Mahmud’un zâbit ve kethüdâ atanması İzzetlü ve fazîletlü efendi hazretlerinin meclis-i şer‘-i şerîf-i şeref-efrâzları savbına dürer-i da‘vât-ı sâfiyât muhabbet-âyât ithâfıyla inhâ-i muhlisâne oldur ki hâliyâ taht-ı hükûmetinizde olan Eyüb ve Küçükçekmece’de sâkin ve mütemekkin olup altı bölük yoldaşları üzerine zâbıt ve kethüdâ yeri nasb ve ta‘yîn olunmak de’b-i kadîm olmağla zümre-i silahdârândan beşinci bölüğe yüz otuz yedi akçe ulûfeye mutasarrıf olan kıdvetü’l-emâsil ve’l-akrân Mahmud dâ‘î-i Kilârî -zîde kadruhû- ocağın kadîmî emekdârı olmağın kethüdâ yeri nasb ve ta‘yîn olunup mektûb-ı muhabbet-nâme birle irsâl olundu inde’ş-şerefi’l-vusûl me’mûldür ki mezbûru hizmet-i mezbûrede istihdâm edip bir vechile taraf-ı âhardan bir ferdi müdâhale ettirmeyesin ve sizler ki altı bölük yoldaşlarısız, mezbûru üzerinize zâbit ve kethüdâ yeri bilip düşen da‘vâ ve nizâ‘ınızı şer‘le ve ma‘rifet-i merkūmla görüp şer‘-i şerîfe itâ‘at ve merkūme inkıyâd üzre olup adem-i itâ‘atden be gāyet [ihtizâr] üzre olasız ve sen ki kethüdâ yeri -zîde kadruhû-’sun ol cânibde olan altı bölük yoldaşları hüsn-i zindegânî üzre zabt u rabt ve vâki‘ olan da‘vâ ve nizâ‘ları şer‘le gördürüp şer‘-i şerîfe itâ‘at etmeyip sana muhâlefet üzre olanları isim ve resimleri ve bölüğü ile yazıp i‘lâm eyleyesin ve ol cânibde bulunan levendât tâifesi sipâhi nâmıyla bayrak ve mızrak getirip re‘âyâ ve ehl-i sûku rencîde üzre olanları dikkat ile ele getirip üzerlerine lâzım gelen edâ-i ahkâm-ı şer‘iyye eyleyesin ki sâire mûceb-i ibret ve sebeb-i nasîhat olup herkes âsûde hâl üzre devâm-ı devlet-i pâdişâhîye du‘âya iştigāl üzre olalar. Bâkī der seccâde-i şerî‘at-ı dâim bâd. Tahrîren fî 14 şehri Zilka‘deti’ş-şerîfe sene isneteyn ve seb‘în ve elf. Vasale ve kuyyide ileynâ fî 15 Zilka‘de sene 1072. Şuhûdü’l-hâl: Sunullah Ağa Sipâhiyân-ı Dergâh-ı âlî hâlâ, Mustafa Ağa Silahdârân-ı dergâh-ı âlî hâlâ, Hasan Ağa ulûfeciyân-ı dergâh-ı âlî hâlâ, Zülfikar Ağa ulûfeciyân-ı yesâr-ı dergâh-ı âlî hâlâ, Ali Ağa gurebâ-i yemîn-i dergâh-ı âlî hâlâ, Mehmed Ağa Azebân-ı yesâr-ı Dergâh-ı âlî hâlâ.