Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 65 Hüküm no: 29 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sürsat ve saman satın alımıyla ilgili mükellefiyetin avârız muafiyetiyle ilgisi olmadığı Akzâ kuzâti’l-müslimîn evlâ vülâtü’l-muvahhidîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak, kazâ-i mezbûre tâbi‘ Küçükçekmece re‘âyâsı hâlâ mahrûse-i Edirne’den Dersa‘âdet’ime adam ve arzuhâl gönderip yine kazâ-i mezbûre tâbi‘ Hazret-i Ebâ Eyyûb Ensârî mahallâtında ve mahkeme kurâsında ve Edirnekapısı ve Topkapısı ve Yenikapı taşrasının mahallelerinde ve on pâre su nâzırı karyeleri tekâlîf-i şâkkadan ve avârızdan ve kendi bağlarının resm-i hamrından mu‘âf ve müsellem olup ve sürsat ve iştirâ samanından ve gayrıdan mu‘âf olmayıp ancak bir sene su yolu bahânesiyle vermeyip mezbûrlar ol vermedikleri seneyi temessük edinip hâlâ bu sene iştirâsı fermân olunan zehâyiri ve dikākı bizimle ma‘an vermekde inâd ve muhâlefet ederler tahammüllerine göre zikr olunan su nâzırı karyeler ahâlîsi dahi mukayyed üzre edâ eylemeleri bâbında emr-i şerîfim verilmek recâ eylediği ecilden Hazîne-i âmiremde mahfûz olan mevkūfât defterlerine nazar olundukda, fermân olunan sürsat ve iştirâ tekâlîf-i örfiyyeden olmayıp mu‘âf ve gayr-ı mu‘âf umûm üzre dâhillerdir ve hatt-ı hümâyûn-ı sa‘âdet makrûn ile mukaddemâ İstanbul’un su yolu için avârız-ı dîvâniyye ve tekâlîf-i örfiyye ve şâkkadan mu‘âf olan karyelerin mu‘âfnâmelerinin kaydında sürsat ile iştirâ takdîrince olunmayıp, sâir tekâlîfden mu‘âflardır dedi taşcı ocağından otuz beş nefer olup hizmetli olmağla sürsat taleb olunmaya deyû emr-i şerîf verildiği mastûr ve mukayyed olmağın vech-i meşrûh üzre amel olunmak emrim olmuşdur. Buyurdum ki hükm-i şerîfim vardıkda bu bâbda sâdır olan emrim üzre amel edip dahi hâlâ fermânım olunan sürsat zahîresine ve iştirâ-i samana mu‘âf ve gayr-ı mu‘âf dâhil olmağla taşcı ocağında olan otuz beş neferden mâ‘adâsından zikr olunan su nâzırı karyeleri ahâlîsine ve sâirlerine ma‘rifet-i şer‘le ale’s-seviyye edâ edip biz mu‘âfız deyû min ba‘d kimesneye ol vechile ta‘allül ettirmeyip emr-i âhar irsâline muhtâc eylemeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis ve’l-ışrîn min şehri Recebi’l-ferd li sene isneteyn ve seb‘în ve elf.