Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 72 Hüküm no: 35 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’den İstanbul’a dönen padişahın maiyeti halkı ve davarları için menzil zahiresi tedariki Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki İnşâ’allâhü te‘âlâ devlet-i ikbâl ve sa‘âdet ve iclâl ile mahrûse-i Edirne’den Âsitâne-i sa‘âdetim tarafına teveccüh-i hümâyûnum mukarrer olmağla rikâb-ı hümâyûnumla memûr olan kapım kulları ve Istabl-ı âmirem davarları için menâzil zahîresi tedârik ve ihzârı lâzım ve mühim olup imdi taraf-ı mîrîden akçesi verilmek üzre İstanbul kilesi arpa yirmi dörder akçeye ve dakīkin kilesi altmış akçeye ve her bir mükemmel otluk arabası yüzer akçeye olmak üzre kazâ-i mezbûre tâbi‘ Çatalca nâhiyesinde iki bin beş yüz kile şa‘îr ve beş yüz kile dakīk ve yalnız yüz seksen araba otluk ve bin altı yüz kantar saman ve yalnız altı yüz çeki odun iştirâ ve tedârik ve Çatalca menziline nâibinle ihzâr ve nüzül emînine teslîm ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi te’hîr ve tevakkuf eylemeyip zikr olunan zahîreyi emr-i şerîfim vardığı gibi hesâb-ı merkūm üzre mu‘accelen iştirâ ve tedârik ve nâibine menzil-i mezbûrda hâzır ve emr-i hümâyûnumda nüzül emînine teslîm edip ol dahi mevkūfât defterlerine kayd ettiresin ki menzil-i mezbûrda ashâbına akçesi Hazîne-i âmiremden bi’t-tamâm edâ oluna ve zikr olunan zahîre iştirâsına mu‘âf ve gayr-ı mu‘âf dâhillerdir ale’s-seviyye beherinin tahammüllerine göre tevzî‘ ettirip kimesneye ta‘allül ve nizâ‘ ettirmeyesin ve tevzî‘ defterinin bir sûretini imzâlayıp mühürleyip mübâşir-i mezbûr ile südde-i sa‘âdetime irsâl eyleyesin husûs-ı mezbûrda ihtimâm üzre olup sonradan tecessüs olundukda, hilâfı zuhûrundan ziyâde hazer eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ min şehri Recebi’l-ferd sene isneteyn ve seb‘în ve elf. Bi-makāmı mahrûse-i Edirne.