|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 91 Hüküm no: 84 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Abdullah’ın Hasan Beşe b. Mehmed’de bulunan ticarî alacağının kefilinden alınması
İşbu bâ‘isü’l-kitâb el-Hâc Mehmed b. Abdullah, meclis-i şer‘de Hasan Beşe b. Mehmed mahzarında üzerine da‘vâ ve takrîr-i kelâm edip mezbûr Hasan Beşe işbu hâzır bi’l-meclis Helvâyî Ahmed Beşe zimmetinde vakıyyesi beynimizde ilm-i şer‘î ile ma‘lûm siyah üzüm fıstık bahâsından beş bin altmış dört akçe hakkım olup meblağ-ı mezbûrun dört bin altı yüz akçesine mezbûr Hasan Beşe emir ve kabûlü hâvîye kefâlet-i sahîha-i şer‘iyye ile kefîl ve zâmin olup meblağ-ı mezbûrdan altı yüz akçesini yedinden ahz u kabz eyleyip meblağ-ı bâkī dört bin akçeyi kefâletine binâen taleb ederim suâl olunsun dedikde gıbbe’s-suâl mezbûr Hasan Beşe cevâbında fi’l-vâki‘ müdde‘î-i mezbûr el-Hâc Mehmed’in merkūm Ahmed Beşe zimmetinde olan beş bin altmış dört akçesinin dört bin altı yüz akçesine ben emir ve kabûlü hâviye kefâlet-i sahîha-i şer‘iyye ile kefîl ve zâmin oldum deyû bi tav‘ihî ikrâr ve i‘tirâf etmeğin alâ mûceb-i i‘tirâfihî meblağ-ı mezbûr dört bin akçeyi müdde‘î-i mezbûra edâ ve teslîme mezbûr Hasan Beşe’ye kefâletine binâen tenbîh olunup mâ vaka‘a kayd şud. Fî 29 min Ramazân sene [10]81.
Şuhûdü’l-hâl: Hasan Halîfe b. Ali, Mehmed [b.] Eyüb, Mehmed [b.] Mahmud, Hasan [b.] Abdullah.
|