Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 129 Hüküm no: 143 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dergo v. Angeli’nin yalan beyanına göre yapılan satıştan rücû ve borcun eskiden olduğu gibi ödeneceği Havâss-ı Aliyye kazâsına tâbi‘ Litros nâm karye sâkinlerinden Dergo v. Angeli nâm zimmî meclis-i şer‘-i hatîrde medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de merhûm Kiremitçi Süleyman Çelebi Evkāfı’na bi’l-fi‘l mütevellî olan sâhibü’l-kitâb Mehmed Çavuş b. Abdüddâim mahzarında ikrâr ve takrîr-i kelâm edip bundan esbâk evkāf-ı mezbûre mütevellîsine semen-i ma‘lûme mukābelesinde karye-i mezbûrede vâki‘ bir tarafı Bostânî Hasan Bey mülkü ve etrâf-ı selâsesi tarîk-i âm ile mahdûd iki bâb tahtânî oda ve bir sagīr hâne ve üzerinde bir bakkal dükkânını müştemil mülk menzilimi cemî‘ tevâbi‘ ve levâhıkı ile alâ tarîki’l-istiğlâl bey‘ ve teslîm ve kabz-ı semen edip ol dahi mâl-ı vakf-ı mezbûr ile tarîk-i merkūm üzre iştirâ ve ba‘de’t-tahliye ücret-i mu‘ayyene-i ma‘lûme ile müddet-i ma‘lûme tamâmına değin bana îcâr ve teslîm ben dahi istîcâr ve tesellüm ve kabûl edip ile’l-ân mâl-ı vakf-ı mezbûrun asl ve ücret-i menzil-i mezkûrdan zimmetimde iki yüz otuz sekiz kıt‘a esedî guruşa cem‘ olup edâsına iktidârım olmamağla işbu târih-i kitâb Şevvâlü’l-mükerreminin on dördüncü günü menzil-i mezkûru mütevellî-i merkūm Mehmed Çavuş’a alâ tarîki’l-muvâza‘a üç yüz elli esedî guruşa bey‘ ol dahi tarîk-i mezbûr üzre iştirâ ve semen-i merkūmdan üç yüz elli guruşun iki yüz otuz sekiz guruşunu zikr olunan Kiremitçi Süleyman Evkāfı’na bâlâda tahrîr olunduğu üzre târih-i merkūme değin müctemi‘a iki yüz otuz sekiz guruşa takās ol dahi mukāssa ve kabûl ve bâkī yüz on iki guruşun doksan guruşunu Davud Paşa Bahçesi Vakfı’na deynim olan yedişer dirhem gelir yüz guruşa mütevellîsine teslîme merkūm Mehmed Çavuş’u tevkîl ve bâkī yirmi iki esedî guruşu mütevellî-i mezbûrdan alıp kabz eyledim deyû kâziben ikrâr ve izhâr-ı bey‘ ve sicil ve hüccet olunmuşdu, el-hâletü hâzihî mütevellî-i mezbûr Mehmed Çavuş menzil-i mahdûd-ı mezkûru bey‘ etmek mümkün olmamağla mâl-ı vakf-ı mezkûra zarar müte‘ayyin ve mütehakkık olmağın minvâl-i muharrer üzre muvâza‘a ve bilece olan bey‘ ve şirâyı ifsâd murâd etmekle ben dahi ihâle-i mezbûreyi kabûl eylemişdim, menzil-i mezkûr ke’l-evvel benim mülkümdür ve târih-i kitâb Şevvâli’nin on altıncı gününe değin zimmetimde müctemi‘a olan iki yüz otuz sekiz guruşdan mâ‘adâ ke’l-evvel sene be sene vakf-ı mezbûra ücret-i menzili edâ ederim deyicek mâ vaka‘a ketb olundu. Fî 20 Zilka‘de sene [10]81. Şuhûdü’l-hâl: İsmail Çelebi b. ( ), Mehmed Çelebi b. Hasan, Hacı Receb b. …?, Mehmed Efendi b. Yusuf.