Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 131 Hüküm no: 152 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Kara Mehmed Beşe’nin yarım hisse evini karısı Zeyneb’e sattığı Yakacık karyesinde sâkin Kahveci Kara Mehmed Beşe b. Mahmud nâm kimesne tarafından ber-vech-i âti’l-beyanda vekîl olduğu Halil Beşe b. Hüseyin ve Mehmed Beşe b. Halil şehâdetleriyle vekâleti sâbit olan Arnavud İbrahim Beşe b. Hasan nâm kimesne meclis-i şer‘-i hatîrde zevcesi olup zâtı vech-i şer‘î üzere mu‘arrefe olan işbu bâ‘isetü’l-vesîka Zeyneb bt. İbrahim nâm hatun mahzarında bi’l-vekâle ikrâr ve takrîr-i kelâm edüp bey‘-i câ’i’z-zikrin vukū‘ına değin müvekkilim mezbûrun yedinde mülkü olup karye-i mezbûrede vâki‘ bir tarafı karındaşı Halil menzili ve bir tarafı el-Hâc Hasan Ağa menzili ve bir tarafı tarîk-i hâs ve bir tarafı tarîk-i âm ile mahdûd fevkānî iki bâb oda ve dehliz ve tahtında ahır ve bir mikdâr avlu ve sokak kapısını müştemil mülk menzilinin nısf-ı şâyi‘ini tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile zevcesi müşteriye-i mezbûreye elli guruşa bey‘ u teslîm ve temlîk edüp ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezbûr elli guruşu müşteriye-i mezbûre yedinden müvekkilim mezbûr bi’t-tamâm ve’l-kemâl ahz ü kabz eyleyüp fîmâ-ba‘d zikri mürûr eden menzilin nısf-ı şâyi‘inde vechen mine’l-vücûh ve sebeben mine’l-esbâb kat‘â ve kātıbeten müvekkilim mezbûrun alâka ve medhali kalmayup zevcesi müşteriye-i mezbûrenin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’r-râbi‘ aşer min-şehri Rebî‘i’l-evvel li-sene selâse ve semânîn ve mi’ete ve elf. Şuhûdü’l-hâl: Kalyoncu Osman Beşe, Feyzullah Beşe, Uzun el-Hâc Mehmed, el-Hâc Hasan Ağa, Mustafa Beşe b. Hüseyin Reis, Ahmed Efendi b. Hüseyin, Mehmed b. el-Hâc Hasan Ağa ve gayruhum.