.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 309
Hüküm no: 343
Orijinal metin no: [50a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şahbaz Bey b. Abdullah’ın ev ve tarlalarını Hacı Hüseyin b. Abdünnebi’ye satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Süleyman Subaşı mahallesinde sâkin Şahbaz Bey b. Abdullah nâm kimesne meclis-i şer‘-i şerîfde işbu râfi‘ü’l-kitâb el-Hâc Hüseyin b. Abdünnebi mahzarında ikrâr ve takrîr-i kelâm edip silk-i mülkümde münselik olup medîne-i mezbûreye tâbi‘ Çatalca nâhiyesinde Sivas nâm karyede vâki‘ etrâf-ı erba‘ası tarîk-i âm ile mahdûd bir bâb fevkānî oda ve bir bâb tahtânî oda ve iki bi’r-i mâ ve havluyu ve beş dib ceviz ağacını müştemil mülk menzilimi cemî‘ tevâbi‘ ve levâhıkı ile mezbûr el-Hâc Hüseyin’e iki bin dört yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra yine tefvîz-i âtî sudûruna değin taht-ı tasarrufumda olup karye-i mezbûre sınırı dâhilinde vâki‘ her birinin hudûdu beynimizde ma‘lûm tahmînen on keyl tohum istî‘âb eder iki kıt‘a tarlalarımın hakk-ı tasarruflarını bi izni’l-mütevellî mezbûr el-Hâc Hüseyin’e dört yüz akçe bedel mukābelesinde tefvîz bi’l-ferâğ edip ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an üç bin akçeyi mezbûr el-Hâc Hüseyin yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrede alâka ve medhalim yokdur, mezbûr el-Hâc Hüseyin’in mülk-i müşterâsı ve arâzi-i merkūme dâhil-i taht-ı tasarrufu olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Saferi’l-hayr li sene ihdâ ve tis‘în elf.


Şuhûdü’l-hâl: Mehmed Bey b. Ahmed, Hüseyin Çelebi b. Ali, Hacı Osman b. Mehmed, ve gayruhüm.