Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 382 Hüküm no: 441 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hatun bt. Abdülkādir Efendi’nin İsak v. Abraham ile olan alacak davalarına Mustafa Bey b. Hüseyin’i vekil tayin ettiği Mahmiye-i İstanbul’da Hobyar mahallesi sâkinelerinden Sâliha Hâtun bt. Abdülkādir Efendi tarafından vech-i âtî üzre vekâlet iddi‘â eden Mustafa Bey b. Hüseyin’den vech-i âtî üzre istişhâd-ı şer‘î sudûrundan sonra mahmiye-i mezbûrede …? Mehmed Çelebi mahallesinde sâkin Süleyman Bey b. Mehmed ve Hacı Rıdvan b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Sâliha ( ) cemâ‘atinden İsak v. Abraham nâm Yahudi’ye mukaddemâ îcâr ettiği beynlerinde ma‘lûm şişehâne ücretine ve sermâye edilmek için mezbûr İsak’a def‘ ve teslîm ettiği yetmiş yedi bin beş yüz akçeye müte‘allika mezbûr İsak ile olan da‘vâsına ve lâzım gelir ise sulha tarafından bizim huzûrumuzda müsteşhid-i mezbûr Mustafa Bey’i mukaddemâ vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd etmişidi, biz bu husûsa bu vech üzre şâhidleriz şehâdet dahi ederiz deyû her biri hasm-ı şer‘î-i câhid mahzarında edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müsteşhid-i mezbûr Mustafa Bey’in vech-i mübeyyen üzre vekâletine hükm olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, fahrü’l-müderrisîn Ahmed Efendi nâib-i keşf, çukadâr Hasan Beşe b. Abdullah, Hasan Çelebi b. Ahmed.