Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 496 Hüküm no: 612 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âlime bt. Mehmed’in cariye, ev, tarla ve eşyalarını mütevelli Hacı Pir Mehmed Ağa’ya hibe etmesi ve vakıf gelirini teslim alması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sâkinelerinden Âlime bt. Mehmed nâm hâtun cemî‘ tasarrufât-ı şer‘îden câize ve teberru‘-ı mer‘iyyeden nâfi‘a olduğu hâlde meclis-i şer‘-i şerîf-i lâzımü’t-teşrîfde li ebeveyn kız karındaşı oğlu işbu râfi‘ü’l-kitâb fahrü’l-eşbâh el-Hâc Pîr Mehmed Ağa b. el-Hâc Kaytas mahzarında bi tav‘ihâ ikrâr-ı tâm ve takrîr-i kelâm edip hibe-i âtiyetü’z-zikrin sudûruna değin silk-i mülkümde münselik olup medîne-i mezbûreye tâbi‘ Arnavud nâm karyede vâki‘ iki tarafı bayır ve bir tarafı mîrî bahçe ve bir tarafı tarîk-i âm ile mahdûd ve üç bâb tahtânî odaları ve ahırı ve bi’r-i mâ ve kenîfi ve zât-ı eşcâr-ı müsmire ve gayr-ı müsmire bahçeyi müştemil çiftlik ta‘bîr olunur mülk menzilimi ba‘de’t-tahliyyeti’ş-şer‘iyye cemî‘ tevâbi‘ ve levâhıkı ile ve menzil-i mezkûr içinde mevcûd yirmi keyl buğday ve yirmi keyl alef ve üç inek ve bir tosun ve bir buzağımı ve sâir yanımda mevcûd emlâkimden orta boylu, açık kaşlı, gök gözlü Rûsiyyetü’l-asl Muammer bt. Abdullah nâm câriyem ile bir köhne kırmızı sofra ve üç müsta‘mel Bursa yasdığı ve bir tarafı alaca kaftan ve kırmızı çuka müsta‘mel kürk kabı ve bir köhne havlu ve bir yeşil dirâyî kaftan ve bir müsta‘mel Lahor kuşağı ve bir müsta‘mel alaca entari ve bir münakkaş müsta‘mel tülbent ortası ve iki basma yorgan yüzü ve bir duvar makraması ve iki köhne yemeni yük perdesi ve bir sarı alaca kaftan ve bir münakkaş yüz yasdığı ve bir örfiyye ve bir hâre gülgûnî kaftan ve iki kumaş Gerede bâlin ve bir fısdıkî kaftan ve bir gülgûnî kadife kaftan ve bir cedîd Şam alacası kaftanı ve bir keremsud kaftanı ve bir telli kadife mak‘ad ve bir gözü atlas kaftan ve bir telli atlas kaftan ve bir kırmızı bohça ve dört mantarî yastık ve on altı Bursa yasdığı ve iki yan mak‘adı ve bir Haleb merresi yün perdesi ve dört basma çit ve bir alaca peşkir ve bir mantarî sofra ve iki köhne ocak yaşmağı ve bir tarafı alaca köhne çintiyân ve iki köhne yemeni yorgan ve bir köhne beyaz velence ve bir köhne kırmızı velence ve üç köhne Selânik yan keçesi ve iki Uşak kaliçesi ve iki döşek ve dört minder ve iki köhne Selânik orta keçesi ve bir köhne kapsız yemeni yorgan ve bir yüz yasdığı kılıfı ve bir tas ve bir sahan ve iki baklava tepsisi ve üç sahan kapağı ve bir tiftik köhne kebe ve üç çini tabak ve iki tencere ve bir leğen ve bir ibriğimi mûmâ-ileyh el-Hâc Pîr Mehmed Ağa’ya hibe-i sahîha-i şer‘iyye ile bi safka-i vâhide hibe ve teslîm ve temlîk edip ol dahi meclis-i hibede minvâl-i muharrer üzre ittihâb ve tesellüm ve temellük ve kabûl eyledi ba‘de’l-yevm emlâk-i mezkûrede vechen mine’l-vücûh alâka ve medhalim kalmadı mezbûr el-Hâc Pîrî Mehmed Ağa keyfe mâ yeşâ’ mutasarrıf olsun ve zikr olunan karyede vâki‘ çiftlik-i mezkûra intimâ ile tahdîd ve tavsîfden müstağnî on altı kıt‘a tarlalarımın dahi hakk-ı tasarruflarını ma‘rifet-i sâhib-i arz ile mûmâ-ileyh Pîr Mehmed Ağa’ya meccânen tefvîz ve ferâğ edip ol dahi ber vech-i muharrer tefevvuz ve kabûl eyledi. Min ba‘d sâlifü’z-zikr on altı kıt‘a tarla mezbûr Pîr Mehmed Ağa’nın dâhil-i taht-ı tasarrufu olmuşdur emsâli gibi mutasarrıf olsun dedikde gıbbe’t-tasdîki’ş-şer‘î mukırra-i merkūme Âlime Hâtun el-Hâc Pîr Mehmed Ağa mahzarında i‘âde-i kelâm edip mezbûr Pîr Mehmed Ağa’ya bâlâda hibe ve temlîk ettiğim menzil ve câriye ve eşyâ-i muharrereden mâ‘adâ altın ve gümüş ve cevâhir makūlesinden ism-i mâl ıtlâk olunur bir şeyim yokdur ve mûmâ-ileyh Pîr Mehmed Ağa’nın karındaşı olup bundan akdem fevt olan el-Hâc Memiş nâm kimesneyi hâl-i hayâtından vasiyy-i muhtâr nasb ve ta‘yîn etmekle müteveffâ-yı mezbûr el-Hâc Memiş zamân-ı vesâyetinde ahz ve kabz eylediği medîne-i mezbûre kurbunda vâki‘ mülk çiftliğim semeni olan bin üç yüz esedî guruşun dört yüz guruşunu benim emrim ile müteveffâ-yı mezbûr el-Hâc Memiş dört nefer kimesneye hâl-i hayâtında yüz guruş verip mâ‘adâ dokuz yüz esedî guruşun bir mikdârını yine benim emrim ile ba‘zı mesârife sarf eyleyip benim dahi makbûlüm olup ve bâkīsi dahi kendi mesârife sarf edip meblağ-ı mezkûr üç yüz guruşdan müteveffâ-yı mezbûr el-Hâc Memiş zimmetinde bir akçe ve bir habbe kalmayıp hayâtında zimmetini ibrâ etmişidim ve mûmâ-ileyh Pîr Mehmed Ağa’nın mütevellî olduğu ceddim Takyeci Üveys ve Zeyneb Hâtun vakıflarının zevâidi olan meşrûta olduğu vakfiye ma‘mûlün-bihâsında mastûr ve mukayyed olmağla ber mûceb-i şart-ı vâkıf on bir senede müctemi‘ olup kendime âid olan hakkımı bi’d-defe‘ât mütevellî-i mûmâ-ileyh Pîr Mehmed Ağa yedinden bi’t-tamâm ahz ve kabz eyledim ba‘de’l-yevm mûmâ-ileyh Pîr Mehmed Ağa zimmetinde galle-i vakf-ı mezkûrdan bana âid olan hakkımdan bir akçe ve bir habbe bâkī kalmadı mezbûr Pîr Mehmed Ağa ile târih-i kitâba gelince beynimizde vâki‘ ahz u i‘tâ ve mu‘âmelât-ı şettâya müte‘allika âmme-i da‘vâdan mûmâ-ileyh el-Hâc Pîr Mehmed Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Mehmed Efendi b. İbrahim el-İmâm, Mustafa Efendi b. Mehmed el-Kadı, Mehmed Efendi b. Süleyman, Mehmed Efendi b. Ebûbekir, Mehmed Çelebi b. Mustafa, Osman Çavuş b. Abdülkādir, Hüseyin Beşe b. Abdullah, Ahmed Çelebi b. Mehmed, Ali Çelebi b. ( ) el-Müezzin, Mehmed Çelebi b. Şaban, Mehmed Çelebi b. İbrahim, Mehmed Çelebi b. Ahmed, Mehmed Efendi b. Bâli, Ali Çavuş b. Mustafa, Yusuf Bey b. Osman, Şaban Beşe b. Mehmed, Hüseyin b. Ali.